काठमाडौंं । नेपाल कम्युनिस्ट पार्टीका महासचिव नेत्रविक्रम चन्द (विप्लव)ले मुलुकको वर्तमान राजनीतिक संरचनाले आत्मनिर्भर निर्णय लिनसक्ने नभएको बताएका छन् ।  सोमबार काठमडौंमा आयोजित वेपत्ता योद्धा र शक्ति प्रक्रिया विषयक अन्तरक्रिया कार्यक्रममा उनले संविधानमा कयौं कुरा अपूर्ण रहेकाले त्यसलाई पूर्णता दिन जरुरी रहेको भन्दै नेपालमा पाँच वर्ष स्थिर सरकार रहने परिकल्पनाको पनि आवश्यक रहेको बताए । 
उनले भने, ‘अहिलेको राज्य जुन छ, यसैमा बस्छु भन्यो भने देशमा भंयकर ठूलो समस्या आउँछ । निकट भविष्यमा आउने छ । किन कि त्यो हाम्रो मात्र चाहनामा छैन । यसको जस्ता खालका संरचना छन्, जस्तो खालका यसका विशेषताहरु देखिएका छन् । यति सजिलो छ यहाँ राजनीतिक व्यापार गर्न । त्यसलाई अहिले भइराखेका नेताहरुले थेग्न सक्छन् ? भन्दा त्यो उनीहरुको चाहाना र शक्तिभित्र नपर्न सक्छ । त्यसैले यसलाई स्थिरता दिने हो । ठोस मूर्त गर्ने हो । कयौं कुरा अपूर्ण छ संविधानमा त्यसलाई पूर्णता दिन जरुरी छ । नेपालमा पाँच वर्ष स्थिर सरकार रहने परिकल्पना गर्न पनि आवश्यक छ । उनले नेपालको राजनीतिक आन्दोलन आत्मनिर्भर बन्न नसक्दा पार्टीहरु जुट्ने र फुट्ने प्रक्रिया चलिरहेको बताए । सरकार ढल्ने बन्ने भन्ने कुरा कतै न कतैबाट प्रभावित हुने भन्दै पार्टी र नेताहरुले आत्मनिर्भर तरिकाले निर्णय लिन नसक्नु दुखद् विषय रहेको उनको भनाइ छ । 
उनले भने, ‘देशमा पार्टीहरु जुटिराखेका छन्, फुटिराखेका पनि छन् । ती सबैको विश्लेषणको पछाडि के छ भने नेपालको राजनीतिक आन्दोलन आत्मनिर्भर बन्न सकेको छैनन् । नेपालको राजनीतिक आन्दोलन देशलाई केन्द्रविन्दुमा राखेर जान सकिराखेको छैन् । पार्टी र नेताहरुले आत्मानिर्भर तरिकाले निर्णय लिन सकेको छैनन् । सरकार ढल्ने बन्ने भन्ने कुरा कतै न कतैबाट प्रभावित हुन्छन् ।’