नवलपुर । नेपाली कांग्रेसका नेता डा. शशाङ्क कोइरालाले निर्वाचनको बेला आफूले गरेको प्रतिबद्धता पूरा गर्ने बताएका छन् । उद्योग वाणिज्य सङ्घ नवलपरासी (बर्दघाट–सुस्तापूर्व)को पाँचौँ साधारणसभाका अवसरमा आज गैँडाकोटमा आयोजित कार्यक्रममा उनले आफूले निर्वाचनको बेला गरेका प्रतिबद्धताअनुसार काम भइरहेको बताए। निर्वाचनको समयमा आफूले गरेका केही प्रतिवद्धता कार्यान्वयनको चरणमा गएको र बाँकी प्रतिवद्धता पुरा गर्नेमा आफू कटवद्ध रहेको बताएका हुन् । नारायणी नदी तटबन्धसहितको हरित सडक, बीपी अन्तर्राष्ट्रिय रङ्गशाला, ट्रमा सेन्टरलगायतका पूर्वाधार निर्माण गर्ने प्रतिबद्धता आफूले जनाएको भन्दै ती कामको सुरुआत भइसकेको उनको भनाइ थियो । उनले देशको समृद्धिका लागि सबैभन्दा बढी सम्भावनाको क्षेत्र कृषिमा लगानी बढाउन आवश्यक रहेकामा जोड दिए ।