काठमाडौं । विश्वव्यापी ख्यातिप्राप्त नृत्य प्रतियोगिता ‘वल्र्ड अफ डान्स नेपाल’को ग्रान्ड फिनाले आज (शनिबार) हुँदैछ ।  साँझ हुने ‘वल्र्ड अफ डान्स नेपाल’को ग्रान्ड फिनालेमा सहभागी हुन भारतीय प्रख्यात कोरियोग्राफर टेरेन्स लुइस काठमाडौं आइपुगेका हुन् । उनीलाई त्रिभुवन अन्तर्राष्ट्रिय विमानस्थलमा ‘वल्र्ड अफ डान्स नेपाल’का कलात्मक निर्देशक जेडी तमु, राष्ट्रिय निर्देशक रोशन गहतराजलगायतको आयोजक टोलीले भव्य स्वागत गरेका छन् ।  देशका विभिन्न पाँच सहरहरू (नेपालगन्ज, बुटवल, पोखरा, काठमाडौं र इटहरी) मा सम्पन्न अडिसनबाट छानिएका उत्कृष्ट प्रतिभाहरूले आजको ग्रान्ड फिनालेमा प्रतिस्पर्धा गर्दैछन् । प्रतियोगितालाई अपर डिभिजन, जुनियर डिभिजन, अपर टिम डिभिजन र जुनियर टिम डिभिजन गरी चार भागमा विभाजन गरिएको छ । प्रत्येक डिभिजनका विजेताले १ लाख रुपैयाँ नगद पुरस्कार र २४ क्यारेट सुनको जलप लगाइएको ट्रफी प्राप्त गर्नेछन् । यस प्रतियोगिताको सबैभन्दा ठुलो आकर्षण भनेको विजेताले विश्व मञ्चमा नेपालको अन्तर्राष्ट्रिय प्रतिनिधित्व गर्न पाउने अवसर हो । अमेरिकी दूतावासको समेत विशेष चासो र सहकार्य रहेको यस कार्यक्रमलाई लिएर नेपाली कला क्षेत्रका दिग्गज व्यक्तित्वहरूले उत्साह व्यक्त गरेका छन् ।