काठमाडौं । क्रिकेटको लोकप्रिय फर्म्याट टि ट्वान्टीको पुरुष विश्व कप आजदेखि भारत र श्रीलंकामा सुरु भएको छ। दक्षिण एसियाली केही राष्ट्रबीचको राजनीतिक तिक्तताले यसपटकको विश्वकपमा प्रत्यक्ष असर परेको छ । पहिला बंगलादेशले सुरक्षाको कारण देखाउँदै भारत भ्रमण नगर्ने निर्णय लिनु र विश्व कप सुरु हुने दिन नजिकिँदै गर्दा पाकिस्तानले भारतसँग नखेल्ने निर्णय गर्नुले क्रिकेटप्रेमीलाई निराश बनाएको छ । यी दुई देशको निर्णयबा बाबजुद विश्व कपको रौनकता अबको एक महिनासम्म चल्नेछ । साविक विजेता विजेतासहित समान २ पटकका च्याम्पियन भारत, इङ्ल्यान्ड, वेस्ट इन्डिज तथा एक पटकका विजेता पाकिस्तान, श्रीलंकालगायत २० राष्ट्रले उपाधिका लागि प्रयास गर्नेछन् । यसपटक विश्व कपमा कुल ५५ खेल आयोजना हुनेछन् । भारतका ५ शहरका तथा श्रीलंकाका २ शहरका ३ गरी ८ वटा क्रिकेट स्टेडियममा विश्वकपका खेल हुनेछन् । भारतमा गुजरात अहमदाबादको नरेन्द्र मोदी स्टेडियम, कोलकाताको इडेन गार्डेन्स, दिल्लीको अरुण जेट्ली स्टेडियम, मुम्बईको वानखेडे स्टेडियम र चेन्नईको एम.ए. चिदम्बरम स्टेडियम विश्वकपका मुख्य स्थल हुन् । यस्तै, श्रीलंकामा कोलम्बोस्थित आर. प्रेमादासा स्टेडियम, एसएससी क्रिकेट मैदान र क्यान्डीको पालकेले क्रिकेट स्टेडियममा खेल हुनेछन् ।

उद्घाटनका दिन ३ खेल
विश्वकपको पहिलो दिन आज ३ खेल हुनेछन् । पहिलो खेल कोलम्बोको एसएससी क्रिकेट मैदानमा पाकिस्तान र नेदरल्यान्ड्सबीच भएका छ ।  भारतमा २ खेल हुनेछन्। कोलकाताको इडेन गार्डेन्समा समूह ‘सी’ अन्तर्गत स्कटल्यान्ड र वेस्ट इन्डिजबीच प्रतिस्पर्धा भएको छ । नेपाल यहि समूहमा‌ रहेको छ । वेस्ट इन्डिज दुई पटकको विश्वकप विजेता टोली हो भने स्कटल्यान्ड अन्तिम समयमा विश्वकपमा प्रवेश गर्ने भाग्यमानी टोली हो । बंगलादेशले भारत भ्रमण गर्न नमानेपछि अन्तर्राष्ट्रिय क्रिकेट परिषद् (आइसिसी) ले वरियताका आधारमा स्कटल्यान्डलाई अवसर दिएको हो ।  आजको अन्तिम खेलमा घरेलु टोली भारतले अमेरिकासँग प्रतिस्पर्धा गर्नेछ । मुम्बईको वानखेडे स्टेडियममा बेलुका ७ ः १५ बजे अमेरिकाविरुद्ध खेल्दै भाररले विश्वकप उपाधि रक्षाको यात्रा सुरु गर्नेछ । गत संस्करण जितेपछि तत्कालीन कप्तान रोहित शर्मा र विराट कोहली टि ट्वान्टी आई क्रिकेटबाट सन्न्यास लिएका थिए ।

नेदरल्यान्ड्सविरुद्ध पाकिस्तानले रोमाञ्चक जीत 
आईसीसी टी–२० विश्वकपमा नेदरल्यान्ड्सविरुद्ध पाकिस्तानले रोमाञ्चक जीत निकालेको छ । कोलम्बोमा खेलिएको खेलमा पाकिस्तानले टस जितेर पहिले बलिङ गर्ने निर्णय गरेको थियो ।   नेदरल्याण्ड्सले १४८ रनको लक्ष्य दिएको थियो । जवाफमा पाकिस्तानले एक बिन्दुमा आफूलाई कठिन स्थिति पाएको थियो । तर फहीम अशरफको धमाकेदार इनिङका कारण पाकिस्तानले ३ विकेटले खेल जित्यो ।   १४८ रनको जवाफमा पाकिस्तानले निकै आक्रामक सुरुवात गर्यो । साहिबजादा फरहान र साम अयुबले छिटो सुरुवात गरे ।  यद्यपि, तेस्रो ओभरमा साम अयुब आउट हुँदा पाकिस्तानलाई पहिलो धक्का लाग्यो । अयुबले २४ रन बनाए । कप्तान सलमान आघाले पनि  असफल भए ।   त्यसपछि साहिबजादा फरहान र बाबर आजमले बलियो साझेदारी गरे । पाकिस्तानले १० ओभरपछि ९०–२ बनाएको थियो । तर त्यसपछि नेदरल्याण्ड्सले उल्लेखनीय पुनरागमन गर्दै लगातार तीन झट्का दियो । पाकिस्तानले १३ ओभरमा १०३ रनमा ५ विकेट गुमाएको थियो ।  बाबर आजम १८ बलमा १५ रन बनाएर आउट भए । फरहानले पनि आफ्नो अर्धशतक बनाउन सकेनन् र उस्मान खानले आफ्नो खाता पनि खोल्न सकेनन् ।   १६ औँ ओभरमा मोहम्मद नवाज १३ बलमा ६ रन बनाएर आउट भएपछि पाकिस्तानलाई ठूलो धक्का लाग्यो। पाकिस्तानलाई चार ओभरमा ३४ रन चाहिएको थियो । तर, १७ औँ ओभरको पहिलो बलमा शादाब आउट भए, जसले गर्दा पाकिस्तानलाई तीन ओभरमा ३३ रन चाहिएको थियो । तर, १९ औँ ओभरमा फहीम अशरफले २४ रन बनाए, जसले खेल पाकिस्तानको पक्षमा मोडियो । अन्तिम ओभरमा केवल पाँच रन आवश्यक थियो । पाकिस्तानले खेल तीन विकेटले जित्यो । फहीम पाकिस्तानका लागि खेल परिवर्तन गर्ने खेलाडी साबित भए । उनले ११ बलमा तीन छक्कासहित २९ रन बनाए ।   पहिले ब्याटिङ गरेको नेदरल्याण्ड्सले राम्रो सुरुवात गर्‍यो । नेदरल्याण्ड्सले पहिलो विकेटका लागि २८ रनको साझेदारी गर्‍यो । चौथो ओभरमा म्याक्स पहिलो बलमा आउट भए ।  माइकलले अर्को ओभरमा फलो गरे । तर त्यसपछि नेदरल्याण्ड्सले राम्रो ब्याटिङ गर्‍यो । नेदरल्याण्ड्सका लागि स्कट एडवर्ड्सले सर्वाधिक ३७ रन बनाए । उनको पारीले नेदरल्याण्ड्सलाई १४७ रन बनाउन मद्दत गर्‍यो ।  

नेपाल र इङ्ल्यान्डको खेल भोलि
नेपालले भने आइतबार दुई पटकको च्याम्पियन इङ्ल्यान्डसँग खेल्दै टि ट्वान्टी विश्वकपको आफ्नो यात्रा सुरु गर्दैछ । नेपालले पहिलो पटक इङ्ल्यान्डसँग खेल्नेछ । नेपालले समूह चरणका आफ्ना सबै ४ खेल मुम्बईको वानखेडे स्टेडियममा खेल्ने तालिका छ। सन् २०१४ मा पहिलो पटक टि ट्वान्टी विश्वकप खेलको नेपालको यो तेस्रो सहभागिता हो भने लगातार दोस्रो हो । अमेरिका र वेस्ट इण्डिजमा भएको पछिल्लो संस्करणमा नेपालले ३ खेल खेल्दा जित निकाल्न सकेन। यद्दपी दक्षिण अफ्रिकासँगको खेल नेपालले १ रनले गुमाउँदै विश्व क्रिकेट जगतमा नेपाली टोलीको‌ चर्चा भएको थियो। पछि दक्षिण अफ्रिकालाई हराउँदै भारत च्याम्पियन बनेको थियो। यस पटक विश्वकपमा सहभागी २० टोलीलाई ४ समूहमा विभाजन गरिएको छ। समूह चरणपछि प्रत्येक समूहका शीर्ष दुई टोलीले सुपर एटमा पुग्नेछन् । सुपर एटका का खेल फेब्रुअरी २२ मा सुरु हुने । सुपर एटको प्रतिस्पर्धा पछि शीर्ष ४ टोली सेमिफाइनलमा प्रवेश गर्नेछन्। सेमिफाइनल पहिलो मार्च ४ र दोस्रो मार्च ५ मा हुनेछ । फाइनल मार्च ८ मा आयोजना हुने तालिका रहेको छ। पाकिस्तानको नतिजाका आधारमा फाइनल भारत वा श्रीलंकामा हुने तय हुनेछ । पाकिस्तान पुगेको अवस्थामा श्रीलंकामा र अन्य अवस्थामा भारतमा फाइनल हुनेछ। भारतसँग फेब्रुअरी १५ हुने खेल समूह चरण खेल नखेल्ने घोषणा गरेको पाकिस्तानले अघिल्ला चरणमा भेट भएको अवस्थामा के गर्ने भन्ने निर्णय सार्वजनिक भएको छैन ।