काठमाडौं । नेपाल उद्योग वाणिज्य महासंघको खेलकुद तथा मनोरञ्जन फोरमको संयोजनमा महासंघ र राष्ट्रिय कलाकारहरू बीचको मैत्रीपूर्ण फुटसल प्रतियोगिता सम्पन्न भएको छ । बालुवाटारस्थित ढुकु फुटसल मैदानमा आयोजना गरिएको सो खेल महासंघको टोलीले कलाकारको टोलीलाई चार गोलकाविरुद्ध सात गोल गरेको थियो । खेलको उद्घाटन महासंघका अध्यक्ष चन्द्र ढकालले रिबन काटेर गरेलगतै महासंघ कार्यसमिति पधाधिकारी र कलाकारबीच १० मिनेटको मैत्रीपूर्ण खेलपश्चात प्रतियोगिता शुरु भएको थियो । 
खेलको पहिलो सत्रमा महासंघले कलाकार टोलीलाई ३–० अन्तरको दबाबमा राखे पनि दोस्रो सत्रमा कलाकारका तर्फबाट ३–३ को बराबरीपछि खेल रोमाञ्चक बनेको थियो । महासंघको टोलीले थप ४ र कलाकार टोलीले थप १ गोल गरेपछि एक घण्टाको मैत्रीपूर्ण खेल ७–४ अंकमा सकिएको थियो ।  खेल उद्घाटन गर्दै महासंघ अध्यक्ष ढकालले खेल केवल प्रतिस्पर्धाका लागि मात्र नभई आपसी मित्रता र सहकार्यको राम्रो अवसर भएको बताए । शुरुको मैत्रीपूर्ण खेल भने ०–० मा सकिएको थियो ।  खेलमा महासंघका तर्फबाट अध्यक्ष ढकाल, उपाध्यक्षद्वय हेमराज ढकाल, ज्योत्सना श्रेष्ठ, कोषाध्यक्ष भरतराज आचार्य तथा कलाकारहरूको टोलीमा शिव श्रेष्ठ, धिरेन शाक्य, रबिन्द्र खड्का, मोहन निरौलालगायतको सहभागिता थियो । उद्योगी व्यवसायी र कलाकार बीचको मित्रता तथा सद्भावलाई थप प्रभावकारी बनाउन मैत्रीपूर्ण प्रतियोगिता आयोजना गरिएको र नेपालमा वरिष्ठ कलाकारहरूको सहभागिताले खेल रोमाञ्चक तथा सफल भएको कार्यक्रम संयोजक महासंघका खेलकुद तथा मनोरञ्जन फोरमका अध्यक्ष हरिबहादुर कार्कीले बताए ।