ललितपुर । सरकारले आज फागुन १३ गते आइतबारदेखि देशभर राष्ट्रिय दादुरा—रुबेला खोप अभियान २०८० सञ्चालन गर्दैछ । दादुरा, रुबेला क्याम्पियन अभियानको रुपमा खोप कार्यक्रम देशैभर सञ्चालन गर्न लागिएको हो । सरकारले सन् २०२६ सम्ममा यो रोग निवारण गर्ने तयारी स्वरुप यो अभियान चालेको हो । 

दादुरा—रुबेला खोप अभियानमा लक्षित समूह नौ महिनादेखि पाँच वर्षमुनिका बालबालिकाहरु र नौ महिनादेखि १५ वर्षमुनिका बालबालिकाहरु रहेका छन् । यस अभियान तराईका २१ जिल्ला र काठमाडौं उपत्यकाका तीन जिल्लाहरुमा नौ महिनादेखि १५ वर्षमुनिका बालबालिकालाई लगाइनेछ । बाँकी जिल्लाहरुमा नौ महिनादेखि ५ वर्षमुनिका बालबालिकाहरुलाई लगाइनेछ । 
यसै सन्दर्भमा शनिबार बिहान ललितपुर महानगरपालिका २७ नं. वडास्थित सुनाकोठी स्वास्थ्य चौकीको समन्वयमा दादुरा–रुबेला खोप अभियान सम्बन्धी बैठक तथा अभिमुखीकरण कार्यक्रम सम्पन्न भएको छ । 

वडा स्तरीय खोप समन्वय समितिका अध्यक्ष एव्म ललितपुर महानगरपालिका वडा नं. २७ का वडा अध्यक्ष कृष्णहरि महर्जनको अध्यक्षमा खोप अभियान सफल पार्ने विषयमा वडाका जनप्रतिनिधि, विद्यालयका प्रधानाध्यापक, सञ्चारकर्मीसहितको बैठक तथा अभिमुखीकरण कार्यक्रममा सरकारको यो अभियान सफल पार्ने विषयमा छलफल भएको हो ।   
सुनाकोठी स्वास्थ्य चौकीका प्रमुख डिल्लीराम श्रेष्ठले खोप अभियानको तयारीका बारेमा बैठक तथा अभिमुखीकरण कार्यक्रममा विस्तृतमा जानकारी गराउनु भएको थियो । 
प्रमुख श्रेष्ठका अनुसार महानगरको २७ नं. वडा कार्यालयमा बालकुमारी मावि सुनाकोठी, लोटररगोमा एकेडेमी सुनाकोठी, विलियम पब्लिक स्कुल सुनाकोठी, सुनागुठी नेवा एकेडेमी सुनाकोठी तथा शरणार्थी शिविर न्याबु सुनाकोठीमा खोप अभियानका लागि केन्द्र तोकिएको जानकारी दिनुभयो । 
‘राष्ट्रिय खोप अभियान अन्तर्गत दादुरा–रुबेला रोगविरुद्ध ९ महिनादेखि १५ वर्षसम्मका बालबालिबालाई MR खोप लगाइने भएकाले तोकिएका खोप केन्द्रमा लगेर बालबालिकाकालाई खोप अभियानमा सहभागी भइ रोगबाट सुरक्षित हुन स्वास्थ्य चौकी आह्वान गर्दछ’ बैठक तथा अभिमुखीकरण कार्यक्रममा स्वास्थ्य चौकी प्रमुख श्रेष्ठले भन्नुभयो,‘यो अभियान सफल पार्न सबै पक्षबाट सहयोग आवश्यक पर्दछ ।’
बैठक तथा अभिमुखीकरण कार्यक्रममा दिइएको जानकारी अनुसार खोप लगाउन आउँदा बालबालिकाको खोप कार्ड अनिवार्य ल्याउन पनि उहाँले सूचित गर्नु भएको छ । सरकारले यो अभियानमा खोप लगाउन छुटेका बालबालिकालाई पनि विभिन्न खोप लगाउने जनाएको छ । 

‘नियमित खोप छुट भएका १ वर्षदेखि ५ वर्ष सम्मका बालबालिकाहरूका लागि PENTA VALENT, PCV, IPV खोप पनि लगाइन्छ’ स्वास्थ्य चौकी प्रमुख श्रेष्ठले भन्नुभयो, ‘खोप अभियानका लागि वडा भित्रका खोप केन्द्रहरूमा १२ जना स्वास्थ्यकर्मीसहितको टोली परिचालन हुनेछ ।’
बैठक तथा अभिमुखीकरण कार्यक्रमका सभापति एवम् वडा नं. २७ का वडाअध्यक्ष कृष्णहरि महर्जनले खोप अभियानलाई सफल पार्न वडा कार्यालयले स्वास्थ्य चौकीलाई आवश्यक सहयोग गर्ने प्रतिवद्धता व्यक्त गर्नुभयो । 
वडा सदस्य श्यामकृष्ण महर्जन तथा रामदेबी महर्जनले वडा भित्र बसोबास गर्ने वडावासीहरू आफ्ना बालबालिकालाई खोप लगाउन चाहे खोप केन्द्र तथा यस्ता अभियानका बारेमा थाहा नपाउँदा खोप लगाउन छुट्ने गरेको स्मरण गराउँदै प्रचार प्रसार अभियानलाई तीब्र पार्नु पर्नेमा जोड दिनुभयो । 

वडा सचिव सनतकुमार थापाले पनि खोप अभियानलाई सफल पार्न वडा कार्यालयले सहयोग गर्ने जनाउँदै खोप अभियानका बारेमा वडावासीलाई सूचित गर्न माइकिङ गर्न सुझाव दिनु भएको थियो ।