जनयुद्धकालीन सहिदको नामावली राजपत्रमा प्रकाशित, सूचीमा ८ हजार ३७१ सहिदको नाम समावेश

समाचार

गृहपृष्ठ
समाचार

जनयुद्धकालीन सहिदको नामावली राजपत्रमा प्रकाशित, सूचीमा ८ हजार ३७१ सहिदको नाम समावेश

शब्दपाटी शनिबार, चैत ४, २०७९

काठमाडौँ । सशस्त्र सङ्घर्षका सहिद भएकाहरूको नामावली राजपत्रमा प्रकाशित भएको छ । गत फागुन १५ गतेको मन्त्रिपरिषद् बैठकले जनयुद्धदेखि विस्तृत शान्ति सम्झौताको अवधिसम्म सहिद भएकाको नामावली राजपत्रमा प्रकाशित गरी राष्ट्रिय सहिदको मान्यता दिने निर्णय गरेको थियो । जनयुद्धका क्रममा सहिद भएका ८ हजार ३७१ जनाको नामावली उक्त सूचीमा समावेश छ । गृह मन्त्रालयले ताप्लेजुङदेखि कैलाली जिल्लासम्म गरेर ७५ जिल्लाको सूची छुट्टा छुट्टै बनाएर प्रकाशित गरेको हो ।
सूची अनुसार सबैभन्दा बढी रोल्पाका ७५३ जना सहिद रहेका छन् भने त्यसपछि क्रमशः दोस्रोमा रुकुमका ५८४ जना, तेस्रोमा कालिकोटका ४३३ जना रहेका छन् ।
सबैभन्दा कम सहिद रहेको जिल्लामा भक्तपुर ६ जना, काठमाडौं ७ र ललितपुर १४ जना रहेका छन् ।
मन्त्रिपरिषद्को निर्णयपछि गृह मन्त्रालयले ७७ वटै जिल्ला प्रशासन कार्यालयमा पत्र पठाई सहिदहरूको अभिलेख माग गरेको थियो । ७७ जिल्लाबाट प्राप्त सोही अभिलेखका आधारमा सहिदहरूको नामावली राजपत्रमा प्रकाशित भएको हो । सशस्त्र द्धन्द्धकालीन सहिदहरूले राष्ट्रिय सहिदको मान्यता पाउनुपर्ने माग बारम्बार उठ्दै आएको भएपनि उनीहरूले राष्ट्रिय सहिदको मान्यता पाउन सकेका थिएनन् । यससँगै जनयुद्धकालमा राज्य र विद्रोही पक्षबाट ज्यान गुमाएका नागरिकले राष्ट्रिय सहिदको मान्यता पाएका छन् । राष्ट्रिय सहिदका परिवारले यसअघि सहिद घोषणा भई राज्यबाट परिपूरण र सम्मानस्वरूप प्राप्त गरेको सुविधाअनुरूप नै क्षतिपूर्ति, परिपूरण र सम्मान पाउनेछन् ।

प्रकाशित मिति: शनिबार, चैत ४, २०७९ ०८:१७

प्रतिक्रिया दिनुहोस्