काबुल (अफगानिस्तान) । अफगानिस्तानका महिलाहरूको एउटा समूहले बिहीबार काबुलमा तालिबानले उनीहरूको अधिकारको उल्लङ्घन गर्दै सरकारी संस्थाहरूबाट महिलाहरूलाई हटाएकोमा विरोध प्रदर्शन गरेको छ । समूहले “अफगानिस्तानको महिला निजामती सेवा रोजगार“ को ब्यानरसहित विरोध प्रदर्शन गर्दै तालिबानलाई महिलाहरूलाई काममा फर्कन अनुमति दिन आग्रह गरेको  टोलो न्युजले उल्लेख गरेको छ ।
कामचलाउ सरकारका पदाधिकारीले सरकारी संस्थामा महिलालाई काम गर्न दिने वा नदिने भन्ने निर्णय आफूले गर्ने बारम्बार बताउँदै आए पनि उनीहरूको भविष्य अझै स्पष्ट हुन सकेको छैन । “महिला कर्मचारीहरू जसको काम घटाइएको छ वा बदलिएको छ– पुरुष कर्मचारीहरूको उपस्थितिको कारणले उनीहरूको तलब पाउने कुनै आशा छैन,“ निजामती सेवामा कार्यरत कर्मचारी समिरा आजमीले भनिन् ।
यी महिलाहरूका अनुसार उनीहरू १० महिनादेखि काम गर्न असमर्थ छन् ।
“हामी आफ्नो धार्मिक अधिकार जोगाएर काममा फर्कन चाहन्छौं,“ निजामती सेवामा कार्यरत फयकाले भनिन् । प्रदर्शनकारीहरूले देशमा छैठौं कक्षाभन्दा माथिका छात्राहरूले अध्ययन गर्ने विद्यालयहरू पुनः सञ्चालनको माग गरेको टोलो न्यूजले उल्लेख गरेको छ ।
“हाम्रो माग, हाम्रा छोरीहरूका लागि विद्यालय खोल्नुहोस्, अन्यथा, हामीले हाम्रा छोरीहरूलाई विदेश पठाउनुपर्नेछ,“ अफगानिस्तानको महिला निजामती सेवा रोजगार संघकी प्रमुख नादिरा रशिदीले भनिन्। सरकारी संस्थामा अधिकांश महिला कर्मचारीलाई पहुँचबाट वञ्चित गरिएको छ । तालिबानले गत अगस्टमा राज्यसत्ता नियन्त्रणमा लिएपछि सरकारी संस्थाहरूमा अधिकांश महिला कामदारहरूलाई कामको पहुँचबाट वञ्चित गरिएको छ र तिनीहरूमध्ये धेरैलाई बर्खास्त  समेत गरिएको छ ।
यसैबीच, तालिबानले छात्राहरूको माध्यमिक शिक्षा निलम्बन गर्दै  हिजाबलाई कडा रूपमा लागू गरेको छ ।
उनीहरूले अफगान महिलाहरूलाई राजनीतिक र सार्वजनिक जीवनमा भाग लिनको लागि कुनै अवसर प्रदान गरेका छैनन् ।  लैङ्गिक विभेद पूर्ण कडारूपमा लागू गरिएको छ । गत वर्ष अगस्टदेखि अफगान महिलाहरू विरुद्ध तालिवानको अत्याचार निरन्तर बढ्दै गएको छ  र महिला अधिकार विरुद्ध प्रतिबन्ध लगाएको छ ।

दक्षिण अफगानिस्तानमा विस्फोट हुँदा ५ सुरक्षाकर्मी र १ सर्वसाधारणको मृत्यु

दक्षिणी कान्दाहार प्रान्तको स्पिन बोल्दाक क्षेत्रमा बिहीबार एउटा गाडीमा विस्फोट हुँदा पाँच सुरक्षाकर्मीसहित छ जनाको मृत्यु भएको प्रहरीले जनाएको छ ।
घातक आक्रमणको पुष्टि गर्दै स्पिन बोल्दाक जिल्लाका प्रहरी प्रमुख मौलावी मोहम्मद हाशिम महमुदले विगतका युद्धहरूबाट बाँकी रहेका विस्फोटक पदार्थले बिहीबार बिहान एउटा गाडीमा प्रहार गरेको थियो ।
यसैबीच स्थानीय सञ्चारमाध्यम टोलोन्युजले शुक्रबार विस्फोटमा एक नागरिक र प्रशासनका पाँच सुरक्षाकर्मीसहित ६ जनाको मृत्यु भएको जानकारी दिएको छ ।
गत वर्ष अगस्टमा तालिबानले अफगानिस्तान कब्जा गरेपछि सडक किनारमा बम विस्फोट र हिंसात्मक घटनाहरू घटेका छन् र तालिबान नेतृत्वको कामचलाउ सरकारले सबै अफगानहरूलाई घर फर्कन र आफ्नो मातृभूमिको पुनर्निर्माणमा हातेमालो गर्न आह्वान गरेको छ ।– रासस–सिन्ह्वा