बुटवल, २३ पुस : नेपाल कम्युनिस्ट पार्टी (एमाले) का उपाध्यक्ष विष्णु प्रसाद पौडेलले एमालेलाई एकल्याउने र कमजोर पार्ने षडयन्त्र सफल हुन नदिने बताएका छन् । उनले पार्टीलाई विभाजित गरेर कम्युनिस्ट आन्दोलनलाई विभाजित गर्ने प्रयास असफल भएको बताए ।

एमाले रुपन्देहीको नवौं जिल्ला अधिवेशनलाई शुक्रबार भैरहवामा सम्बोधन गर्दै उपाध्यक्ष पौडेलले भने, 'एमाले अन्य पार्टी भन्दा ठूलो भएर मात्र हुँदैन, एक्लै स्पष्ट बहुमत ल्याउनुपर्छ ।' उनले धेरै जनताले पत्याएको तथा धेरै नेता कार्यकर्ता आबद्ध भएको पार्टी एमाले भएको बताए ।

उनले भने, 'विचार, नीतिको हिसाबले यो देशको नेता एमाले हो । एमाले सर्वाधिक शक्तिशाली पार्टी हो ।' पूर्व उपप्रधान तथा अर्थमन्त्रीसमेत रहेका नेता पौडेलले विभिन्न प्राविधिक कारणले एमाले प्रतिपक्षमा रहे पनि जनताको साथमा एमाले रहेको बताए । पार्टीप्रति गर्व गरी अझ यसलाई शक्तिशाली र बलियो बनाउनुपर्ने उनको भनाइ थियो ।

'एमाले र एमालेको जीवनमा यतिबेला धेरै ठूलो संकट आएको छ, सबै प्रहार र षडयन्त्रलाई परास्त गरेका छौं,' उनले भने । रुपन्देही क्षेत्र नम्बर २ बाट निर्वाचित प्रतिनिधिसभा सदस्य समेत रहेका पौडेलले एमाले र एमालेको जीवनमा यतिबेला धेरै ठूलो संकट आएको बताए । उनले परिवर्तनको संवाहक शक्तिको रूपमा एमालेले आफूलाई स्थापित गरेको बताए ।

एमालेका सचिव, लुम्बिनी प्रदेशका इन्चार्ज तथा पूर्वमन्त्री छविलाल विश्वकर्माले एमाले पुनः जिम्मेवारीमा आउने दाबी गरे । उनले आम जनताले पार्टीप्रति गरेको विश्वासलाई अझ प्रगाढ बनाउनुपर्नेमा जोड दिए ।

पार्टीका स्थायी समिति सदस्य तथा पूर्वमन्त्री घनश्याम भुसालले आजको कम्युनिस्ट पार्टीको ठूलो चुनौती भनेकै दलाल पुँजीवादबाट बच्नु भएको बताएका छन् । उनले यसबाट बच्न सके क्रान्ति सफल हुने बताए ।

एमाले रुपन्देहीका अध्यक्ष शिवराज सुवेदीको अध्यक्षतामा भएको कार्यक्रममा उपाध्यक्ष पुरुषोत्तम घिमिरे, सचिव जगेश्वरदेवी चौधरीलगायतले बोलेका थिए । दुई दिनसम्म चल्ने अधिवेशनले नयाँ नेतृत्वको चयन गर्ने छ ।

जसपा नेता मञ्जित यादव एमाले प्रवेश

जनता समाजवादी पार्टी (जसपा)का लुम्बिनी प्रदेश समिति सदस्य मञ्जित यादव (सोनु) नेकपा कम्युनिस्ट पार्टी (एमाले) मा प्रवेश गरेका छन् । शुक्रबार एमालेको नवौं जिल्ला अधिवेशनमा यादव जसपा परित्याग गरी एमालेमा प्रवेश गरेका हुन् ।

उनलाई एमालेका उपाध्यक्ष विष्णु प्रसाद पौडेल, स्थायी समिति सदस्य घनश्याम भुसाल, रुपन्देही जिल्ला अध्यक्ष शिवराज सुवेदी लगायतले पार्टीमा प्रवेश गराएका हुन् । यादव गत स्थानीय तहको निर्वाचनमा रुपन्देहीको ओमसतिया गाउँपालिकाको अध्यक्ष पदमा तत्कालीन संघीय समाजवादी पार्टीबाट उम्मेदवार भई दोस्रो स्थान हासिल गरेका थिए ।

त्यस्तै ओमसतिया गाउँपालिका वडा नम्बर ४ का वडाअध्यक्ष मसहुर आलम खान पनि एमालेमा प्रवेश गरेका छन् । उनी गत स्थानीय तहको निर्वाचनमा संघीय समाजवादी पार्टीबाट वडाध्यक्षमा निर्वाचित भएका थिए ।

कार्यक्रममा विभिन्न पार्टी परित्याग गरी एक हजार बढी नेता कार्यकर्ता एमालेमा प्रवेश गरेको पार्टीका लुम्बिनी प्रदेश सदस्य गुणाखर भुसालले बताए ।