ललितपुर । ललितपुर महानगरको चक्रपथ बाहिरका वडाहरु भिलिमिली हुने भएका छन् ।  ललितपुर महानगरले चक्रपथबाहिरका वडाहरु सुनाकोठी, बुङमती, खोकना, हरिसिद्धि, भैसीपाटी, धापाखेलमा स्मार्ट सडकबत्ती जडान गरेसँगै  यी वडा उज्यालो हुने भएका छन् । 
ललितपुर महानगरले यी वडाहरुमा १४ सय बत्ती जडान गरेको नगरप्रमुख चिरीबाबु महर्जनले जानकारी दिए । उनले भने, ‘धेरै जसो ठाउँमा बत्ती जडानको काम सकिएको छ, कुनै कुनै ठाउँमा प्राविधिक कुरा मिलाउनु पर्नेछ ,दुई साताभित्र यो काम पनि समाप्त हुन्छ ।’

स्मार्ट सडक बत्ती जडान गर्ने ललितपुर महानगरपालिका पहिलो स्थानीय तह हो । यस अघि नेपालमा यस किसिमको सडक बत्ती जडान भएको छैन । यो सडक बत्तीलाई कम्प्युटरको सहायताले सर्भर रुमबाट नियन्त्रण गरिन्छ । अर्थात पोलै पिच्छे बत्ती निभाउन, बाल्न र बत्तीको पावर कम गर्न ९डिमिङ० बत्ती जडान भएको ठाउँमा आउनु पर्दैन । सर्भर रुमबाट नै गर्न सकिन्छ । सडक बत्ती बाले बापतको शुल्क मिटरबाट रिडिङ गरिने व्यवस्था हुन्छ । उक्त मिटरमा उठेको शुल्क महानगरपालिकाले भुक्तानी गर्नेछ । 

महानगरको ‘कोर एरिया’मा दुई वर्ष अघि नै स्मार्ट सडक बत्ती 
ललितपुर महानगरको ‘कोर एरिया’ मा स्मार्ट सडक बत्ती जडान भइसकेको छ । यी बत्ती जडान भएपछि सडक उज्यालो र सुरक्षित भएका छन् । 
महानगरपालिकाभित्रका तीनवटा रुटमा जम्मा ६ सय ६९ वटा स्मार्ट सडकबत्ती जडान भएका हुन् । बाग्मती पुलबाट जवालखेल लगनखेल हुँदै सातदोबाटोसम्म, हिमालय होटेल (इनार), पाटनढोका, अशोक हल, क्वाल्खु हुँदै मंगलबजार, लगनखेलसम्म, पुल्चोक महानगरपालिका कार्यालयबाट मंगलबजार हुँदै ग्वार्कोसम्म सडकबत्ती जडान भएका हुन् । स्मार्ट सडक बत्ती जडानका लागि प्राविधिक सहयोग तथा निरीक्षण नेपाल विद्युत प्राधिकरणले गरेको हो । 

चक्रपथमा पनि सडक बत्ती 

ललितपुर महानगरले चक्रपथमा पनि स्मार्ट सडक बत्ती जडान गर्ने भएको छ ।  महानगरले विद्युत प्राधिकरण र सडक विभागसँग सहकार्य गरी महानगरभित्र पर्ने चत्रपथ  खण्डमा स्मार्ट सडक बत्ती जडान गर्न लागेको हो । बत्ती जडानका लागि समझदारीपत्रमा हस्ताक्षर समेत भइसकेको महानगरप्रमुख चिरीबाबु महर्जनले बताए । चत्रपथमा जडान गरिने स्मार्ट सडक बत्तीले रातको समयमा हुने सडक दुर्घटना न्यून हुने नगरप्रमुखले बताए । उनले भने, ‘अधिकांश दुर्घटना राति भएका छन् ,ती दुर्घटना बत्ती नभएको कारणले भएका हुन् ।’ स्मार्ट सडक बत्तीले सडकलाई उज्यालो र सुरक्षित बनाउने उनको भनाई छ ।