दारएसलाम, २१ माघ । पाँच महिना लामो खडेरीका कारण तान्जानियामा घर पालुवा गाई, बाख्रा, भेडा, गधासहित तीन लाख छ हजार ३५८ जनावरको मृत्यु भएको पशुपालन तथा मत्स्य पालन मन्त्रालयले जनाएको छ ।  पशुपालन तथा मत्स्य पालन मन्त्री माशिम्बा एनडिकीले जनवरीमा मन्त्रालयका विशेषज्ञहरूले गरेको आँकलनअनुसार लामो सुक्खाको कारण पानी र चरनको अभावले गर्दा सेप्टेम्बर २०२१ देखि जनवरी २०२२ अन्त्यसम्ममा ती जनावरहरूको मृत्यु भएको हो ।  अरुशा, किलिमन्जारो, मरोरा, मोरोगोरो, टांगा र कोस्टमा यी जनावरहरू मरेका हुन् । यो छ वटा क्षेत्रमा मौसमी वर्षापछि लामो सुक्खाका कारण चौपायालगायतका जङ्गली जनावरहरू प्रभावित भएका एनडीकीले सिन्ह्वालाई बताए ।  टेलिफोनमार्फत गरिएको सोधपुछमा उनले भने, “यी छ वटा क्षेत्रमा जनवरीको अन्त्यतिर पानी पर्न थालेको छ यसका लागि हामी भगवानप्रति आभारी छौँ ।”  सरकारले पशुहरूलाई थप मृत्युबाट बचाउने उद्देश्यले विभिन्न उपायहरू अपनाएको छ, जसमा गाईलाई किर्नाबाट जोगाउन गाईवस्तु डुबाउने पोखरीहरूको निर्माण गरिएको छ । पशुपन्छीलाई पानी उपलब्ध गराउन पशुपन्छी तथा मत्स्य मन्त्रालयको सहयोगमा छनोट गरिएका क्षेत्रमा बोरीङहोल खन्दै आएको मन्त्रालयले बताएको छ ।– रासस/सिन्ह्वा