त्रिपोली, १३ माघ । लिबियाका लागि संयुक्त राष्ट्रसंघका महासचिवका विशेष सल्लाहकार स्टेफनी विलियम्सले यहाँका  राजनीतिक दलहरूलाई देशमा आम निर्वाचनको स्पष्ट समयरेखा तय गर्न आह्वान गरेका छन् । विलियम्सले बुधबार दक्षिणी शहर सभाको नगर परिषद्का प्रतिनिधिहरूसँगको भेटमा उक्त टिप्पणी गरेका हुन् । बैठकमा शिक्षाविद्, प्रतिष्ठित व्यक्तित्व र युवा तथा महिला समूहका प्रतिनिधिहरुको सहभागिता रहेको थियो । ‘आजको मेरो भ्रमण सभाका मानिसहरूलाई आमनेसामने भेट्ने मेरो दृढ संकल्पको अभिव्यक्ति थियो र उनीहरूका सरोकार र विचारहरू विशेष गरी लिबियाको राजनीतिक भविष्य र त्यसमा कसरी संयुक्त राष्ट्रसंघले उनीहरूलाई शान्तिको खोजीमा मद्दत गर्न सक्छ भन्ने बारेमा छलफल गर्नु थियो’ राष्ट्र संघका महासचिवका विशेष सल्लाहकार विलियम्सले भने ।
‘सभा नगरबाट मैले प्रतिनिधिसभा, राज्यको उच्च परिषद्, राष्ट्रिय एकताको सरकार र अन्य सम्बन्धित निकाय र दलहरूलाई आफ्ना जनताको इच्छा सुन्न र निर्वाचनलाई दृढताका साथ अघि बढाउन आह्वान गरेको छु। सहमतिको बाटो र स्पष्ट समयरेखा मार्फत जसले छोटो सम्भावित समय सीमामा चुनाव गराउन सक्छ त्यस बारे छलफल गर्नुहोस्’, विलियम्सले भने । लिबियामा गत वर्ष डिसेम्बर २४ मा राष्ट्रपतिको निर्वाचन हुने अपेक्षा गरिएको थियो तर प्राविधिक र कानुनी कारणले निर्वाचन अनिश्चितकालका लागि स्थगित भएको निर्वाचन आयोगले जनाएको छ । चुनाव संयुक्त राष्ट्रसंघ(प्रायोजित लिबिया राजनीतिक संवाद फोरम द्वारा अपनाईएको रोडम्यापको एक हिस्सा हो जुन वर्षौंको राजनीतिक विभाजन र असुरक्षापछि लिबियामा स्थिरता ल्याउने उद्देश्यले  निर्देशित छ ।–रासस/सिन्ह्वा