मोगादिशु, १२ माघ ।सोमालियाली राष्ट्रिय सेना (एसएनए) ले बुधबार सोमालियाको मध्य भागमा रहेको धुसामुरेब सहर नजिकै विद्रोहीविरुद्ध शक्ति परिचालन गरेपछि २० अल–शाबाब आतङ्कवादीको मृत्यु भएको सेनाले बताएको छ ।  सेनाले विद्रोहीविरूद्धको कारबाही सफल भएको दाबी गर्दै दर्जनौँ हतियार सुरक्षा नियन्त्रणमा लिएको जनाएको छ । सैनिक प्रमुख कमान्डर ओडोवा युसुफ रेजले सोमालियाली नेशनल न्यूज एजेन्सीलाई बताएअनुसार विद्रोहीले सहरमा आक्रमण गर्ने योजनासहित आएको र उनीहरूबाट सेनाले विस्फोटक पदार्थसहित केही हतियारसम्बन्धी उपकरणहरू फेला पारेको छ ।  रेजले भने, “एसएनए फौजले बुधबार बिहान धुसामुरेब सहर नजिकै सैन्य परिचालनको दौडानमा २० अल–शाबाब विद्रोहीको मृत्यु भएको छ । कारबाहीमा केही महत्वपूर्ण विस्फोटक पदार्थ र हतियारसम्बन्धी उपकरण बरामद गरेको छ ।” यस हप्ता सेनाले यस क्षेत्रमा आक्रमण गर्ने विद्रोहीको योजना असफल पारेको यो दोस्रो पटक हो ।
रेजले भने, “सेनाहरूले तिनीहरूलाई त्यस इलाकाबाट बाहिर नलगेसम्म खेद्ने छ ।” देशमा सङ्घीय संसद्को सदन केही सीटका लागि निर्वाचन गर्न लागिरहेको समय विद्रोही समूहमाथिको यो पछिल्लो आक्रमण हो । यो कदम मध्य र दक्षिणी क्षेत्रहरूमा अल–शबाब कट्टरपन्थीहरूविरुद्ध सोमालियाली सेनाहरूको तीव्र परिचालनबीच आएको छ जहाँ विद्रोहीहरूले अझै पनि ग्रामीण क्षेत्रहरूमा लुकेर र एम्बुस थापेर सुरक्षाकर्मीविरूद्ध आक्रमण जारी राखेका छन् ।–रासस/सिन्ह्वा