जुबा, १२ माघ । दक्षिण सुडानको जान्गेली राज्यमा भएको दुई जातिबीचको दङ्गामा परी कम्तीमा पनि ३२ जनाको ज्यान गएको छ ।
मङ्गलबार उक्त राज्यको प्रहरीले सो जानकारी दिएको हो । सो राज्यको प्रहरीका अनुसार छिमेकी राज्य पिबोरबाट एक समूहका नागरिकले हमला गरेका थिए । सो हमलामा परेर ३२को ज्यान गएको र अरु कैयौँ घाइते भएका थिए । यी दुई राज्यमा यहाँका स्थानीय जातीय समुदायबीचमा समय समयमा हुने हिंसामा परी कैयौँ मानिसको ज्यान जाने गरेको छ ।

सिरियामा पाँच सयभन्दा बढी लडाकूद्वारा आत्मसमर्पण
सिरियामा आतङ्ककारी घोषणा गरिएको समूह इस्लामिक स्टेट (आइएस)का ५०० भन्दाबढी लडाकूले आत्मसमर्पण गरेका छन् ।  सरकारी अधिकारीले दिएको जानकारीअनुसार उनीहरुले सिरियाली सुरक्षा फौज समक्ष आत्मसमर्पण गरेका हुन् । 
“आत्म समपर्ण गर्ने विद्रोही लडाकूको सङ्ख्या ५५० भन्दा धेरै रहेको छ,” एक सरकारी अधिकारीले भने । आत्मसमर्पण गरेका सबै लडाकू कारागारमा राखिएका थिए । यही जनवरी २० मा लडाकूले अल हासाकाहमा रहेको अल सिनाअ कारागारमा आक्रमण गरेका थिए । त्यही बेलामा धेरै लडाकूलाई सरकारी फौजले समातेर कारागारमा राखेको थियो । 
लडाकूले जेलमा आक्रमण गर्दा लडाकू र सरकारी सुरक्षाकर्मीबीचमा भीडन्त पनि भएको थियो । लडाकूसँग भीड्नका लागि १० हजार सरकारी सुरक्षाकर्मी परिचालन गरिएको थियो । लडाकू र सुरक्षाकर्मीकाबीचमा देशका विभिन्न ठाउमा अहिले पनि बेला बेलामा भीडन्त हुने गरेकाले हजारौँ मानिस विस्थापित भएका छन् ।–रासस/सिन्ह्वा