इस्तानबुल, ११ माघ । टर्कीको राजधानी इस्तानबुलमा मङ्गलबारदेखि निजी यातायातका साधन सञ्चालनमा रोक लगाइएको छ । देशको सबैभन्दा ठूलो सहरसमेत रहेको इस्तानबुलमा व्यापक हिमपात भएकाले यातायातका साधान सञ्चालन रोकएकोे हो ।
मङ्गलबार बिहान जारी गरिएको वक्तव्यमा इस्तानबुलका गभर्नर अली येर्लिकायाले सार्वजनिक यातायात मात्रै सञ्चालन हुन दिन आग्रह गरेका छन् ।  हिमपातले बाटोहरू पुरिएकाले थोरैथोरै मात्रै खुलाउन सकिएको र थोरै मात्रै खुलाउदा साँघुरो भएको बाटोमा सार्वजनिक यातायात मात्रै चलाउने व्यवस्था गरिएको उनको भनाइ छ ।   हिमपातका कारण साँघुरो भएको बाटोमा निजी यातायातका साधन चलाउँदा सार्वजनिक यातायातका साधन चल्न नमिल्ने भएकाले निजीलाई प्रतिबन्ध लगाइएको गभर्नर ऐर्लिकायाले स्पष्ट पारे । स्तानबुलमा मात्रै एक करोड ६० लाख मानिस बसोबास गर्दछन् । सोमबार निजी र सार्वजनिक दुवै सवारी साधनहरू चलाउन खोज्दा बाटोमा समस्या भएर हजारौँ मानिस लामो समयसम्म सडकमै रोकिनु परेको थियो । हिमपातका कारण पाँच हजार मानिस विस्थापित भएको सरकारी अधिकारीहरूले जानकारी दिएका छन् । तीमध्ये तीन हजार मानिस आफ्नो घरमा बस्न नसकेर होटल, गेस्ट हाउस र विभिन्न शिविरहरूमा पुगेका छन् । त्यसैगरी स्तानबुलबाट हुने उडान पनि बन्द गरिएको सरकारी अधिकारीहरूले जानकारी दिएका छन् ।– रासस/सिन्ह्वा