इस्लामाबाद, ११ माघ । भ्रष्टाचारसम्बन्धी सूचकाङ्क मापनका आधारमा पाकिस्तान अघिल्लो बर्षभन्दा थप १६ देश पछाडि परेको छ ।  विश्वभरीका १८० देशहरूको सूची प्रकाशित भएकोमा पाकिस्तान १४० औँ क्रम सङ्ख्यामा परेको हो । ट्रान्सपरेन्सी इन्टरनेशनलले सार्वजनिक गरेको सन् २०२१ को अध्ययन प्रतिवेदनमा पाकिस्तानमा भ्रष्टाचार पहिलाभन्दा बढेको उल्लेख गरिएको छ । 
ट्रान्सपरेन्सीले विभिन्न मापदण्ड बनाएर स्वतन्त्रपूर्वक ती सबै देशमा अध्ययन गरेर हरेक वर्ष विश्वभरी एकैचोटी प्रतिवेदन सार्वजनिक गर्ने गर्दछ । भ्रष्टाचार थप बढेको देखिएपछि पाकिस्तानका विपक्षी दलहरूले सरकारको थप आलोचना गरेका छन् । उनीहरूले प्रधानमन्त्री इमरान खान नै यसको मुख्य दोषी भएको आरोप पनि लगाएका छन् ।
“पाकिस्तानको सरकार भ्रष्टाचारमा कति लागेको छ भन्ने कुरा अन्तर्राष्ट्रिय यस संस्थाको प्रतिवेदनले पनि प्रमाणित गरेको छ,” विपक्षी दल पीएमए–एनले भनेको छ । विपक्षी दलका नेताहरूले अहिलेको सरकारलाई एक दिन पनि निरन्तरता दिन नहुने र जति ढिला भयो, त्यति मुलुकलाई क्षति हुने दाबी गरेका छन् । अहिलेको सरकारलाई तत्काल विघटन गराउनुपर्ने उनीहरूको माग छ । 
कानुनी शासनको उलङ्घनलगायतका कारणले भ्रष्टाचार बढीरहेको उनीहरूको आरोप छ । 
अघिल्लो वर्ष १८० देशमध्येबाट १२४ औँ क्रममा रहेको पाकिस्तान अहिले १८० मध्येमै १४० औँ क्रममा पुग्नु साह्रै चिन्ताको अवस्था भएको विपक्षीहरूको भनाइ छ । भारत र बङ्लादेशको आफ्नो अवस्थालाई यथावत राख्नसक्ने तर पाकिस्तानले किन सक्तैन भन्दै खान सरकारसँग जवाफ मागेका छन् ।– रासस/एएनआई