ओस्लो। तालिबानका प्रतिनिधि र युरोपेली संघका प्रतिनिधिबीच पहिलोपटक उच्चस्तरीय भेटवार्ता भएको छ। सोमबार युरोपेलीसंघसहित अन्य सात देशका प्रतिनिधिले तालिबानसँग वार्ता गरेका हुन्।
 अफगानिस्तानलाई गत अगष्टमा आफ्नो नियन्त्रणमा लिएपछि तालिबानले पहिलोपटक पश्चिमा देशका प्रतिनिधिसँग यसरी वार्ता गरेका हुन्। सोमबारबाट सुरुवात भएको वार्ता बुधबारसम्म चल्नेछ।
 टोलो न्युजले अफगानिस्तानको विदेशमन्त्रालयलाई उदृत गर्दै तालिबान सरकारका अन्तरिम विदेशमन्त्री अमिर खान मुत्ताकी र उनका प्रतिनिधिमण्डलका सदस्यले ओस्लोमा उच्चस्तरीय भेटवार्ता गरेको जनाएको छ। मन्त्रालयका प्रवक्ताले ट्विटरमा दिएको जानकारीअनुसार तालिबानका प्रतिनिधिले युरोपेली संघमा दूतसँगै अमेरिका, बेलायत, नर्वे, जर्मनी, इटाली, फ्रान्स र कतारका प्रतिनिधिसँग छलफल गरे। बैठक पूर्ण रुपमा अफगानिस्तानको अर्थव्यवस्था, त्यहाँ चाहिने मानवीय सहायता, सुरक्षा, केन्द्रीय बैंकको अवस्था, स्वास्थ्यमा केन्द्रीत भएको उनको भनाइ छ।
अमेरिकाले सो क्रममा तालिबान नेतृत्वको अफगानिस्तानलाई आफूले सहयोग गर्ने नयाँ बाटो खोजिरहेको उल्लेख गरेको थियो। तालिबानले सत्तामा आएपछि महिला अधिकार सुनिश्चित गर्ने बताएको थियो। तर पछिल्ला घटनाक्रममा तालिबानले महिलालाई विद्यालय, विश्वविद्यालय पठाउन अस्वीकार गरेको देखिएको छ। महिलामाथि तालिबान कट्टर हुँदै गएको भन्दै महिला अधिकारकर्मीले चिन्ता व्यक्त गरेका छन्।