खोप नलगाएका मानिसका लागि ओमिक्रोन ’खतरनाक’ भाइरस : डब्ल्युएचओ प्रमुख

शुक्रबार, पुस ३०, २०७८

स्विजरल्याण्ड (जेनेभा), ३० पुस । कोभिड–१९ को ओमिक्रोन भेरियन्ट विशेष गरी खोप नलगाएका व्यक्तिका लागि “खतरनाक भाइरस” भएको विश्व स्वास्थ्य संगठन (डब्ल्यूएचओ) का महानिर्देशक टेड्रोस अधानोम गेब्रेयससले उल्लेख गरेका छन् ।
“यद्यपि ओमिक्रोन डेल्टाभन्दा कम गम्भीर भाइरस हो तर विशेष गरी खोप नलगाएकाका लागि भने यो खतरनाक नै हुन्छ,” टेड्रोसले कोभिड–१९ बारे पत्रकार सम्मेलनमा उक्त कुरा बताएका छन् । उनले यसको सङ्क्रमण दर तीव्र रहेको र सबैतिर फैलिएकाले सतर्क रहनसमेत आग्रह गरेका छन् ।
डब्ल्यूएचओ प्रमुखले अफ्रिकाको कोभिड खोपको दरलाई उल्लेख गर्दै भने “अफ्रिकामा ८५ प्रतिशतभन्दा बढी मानिसले खोपको एक खुराक प्राप्त गर्न बाँकी छ । हामीले यो अन्तरलाई बन्द नगरेसम्म हामी महामारीको तीव्र चरण समाप्त गर्न सक्दैनौं ।” 
“हामी प्रगति गर्दैछौँ, डिसेम्बरमा, कोभ्याक्स अन्तरगत नोभेम्बरमा पठाइएको डोजको संख्या दोब्बरभन्दा बढी पठाउँछौँ  र आगामी दिनमा एक अर्ब खोप डोज पठाउने प्रयास गर्छौं,” उनले भने ।
उनले गत वर्ष हामीले भोगेका केही आपूर्ति अवरोध अहिले सहज हुन थालेको तर यस वर्षको मध्यसम्ममा प्रत्येक देशको ७० प्रतिशत जनसङ्ख्यालाई खोप लगाउने लक्ष्यमा पुग्न अझै लामो यात्रा गर्न बाँकीसमेत रहेको उल्लेख गरेका छन् । 
नब्बे देशले अझै ४० प्रतिशत लक्ष्यमा पुग्न सकेका छैनन् र तीमध्ये ३६ देशले आफ्नो जनसंख्याको १० प्रतिशतभन्दा कम खोप लगाएका छन्, उनले थपे ।
“डब्लुएचओ र हाम्रा साझेदारले यी देशलाई नेतृत्व र समन्वयमा, आपूर्ति दृश्यताको कमी, प्रदान गरिएका खोपको छोटो शेल्फ–लाइफ, सीमित कोल्ड चेन क्षमता, खोप आत्मविश्वास, स्वास्थ्यकर्मीको अभाव र प्रतिस्पर्धी प्राथमिकतामा सामना गर्ने अवरोध हटाउन सक्रियरूपमा समर्थन गरिरहेका छन् ।” डब्ल्युएचओ प्रमुखले बताएका छन् ।–रासस/एएनआई
 

प्रकाशित मिति: शुक्रबार, पुस ३०, २०७८  ०७:४७
प्रतिक्रिया दिनुहोस्
विशेष
अन्तर्वार्ता
जीवनशैली
शिक्षा
समाचार