काठमाडौं । नेपाल र म्यानमारबीच सिधा हवाई यात्रा सुरु हुन पर्नेमा व्यवसायीहरुले जोड दिएका छन् । नेपाल म्यानमार चेम्बर अफ कमर्स स्थापनाको  १३ वर्ष पूरा भएको अवसरमा आयोजित कार्यक्रममा व्यवसायीहरुले नेपाली भाषिको बसोवास रहेको नेपाल र म्यानमारबीच सिधा हवाई सेवा सुरु हुदाँ दुबै देशलाई फाइदा पुग्ने बताएका हुन् । 
भाषा र संस्कृतिका हिसावले पनि दुईदेश बीच गहिरो सम्बन्ध रहेको भन्दै उनीहरुले दुई देशबीचको व्यापार प्रर्वद्धनका लागि आवश्यक पहल हुनु पर्ने बताए । 
नेपाल म्यानमार चेम्बर अफ कमर्सका अध्यक्ष शिवकुमार अग्रवालले लुम्बिनी र म्यानमारबीच सिधा हवाई सम्बन्ध स्थापनका लागि सरकारको ध्यानाकर्षण गराए । 
उनले दुई देशबीचको व्यापारिक सम्बन्ध थप बलियो बनाउन पनि हवाई सेवा सुरु गर्नु जरुरी रहेको बताए । 
उनले म्यानमारमा रहेका नेपाली समुदाय दोस्रो ठूलो डायस्पोरा भएको र नेपालको सन्दर्भमा सफ्ट पावरको रुपमा काम गर्न सक्ने बताए। 
निर्यातका लागि जडिबुटी र आयुर्वेदिक औषधि प्रमुख उत्पादन हुन सक्ने बताएका उनले व्यापार, लगानी र पर्यटन प्रवर्द्धन गर्न दुवै देशका सरकारलाई सिधा हवाई सम्पर्क स्थापना गर्न आग्रह गरे ।  ‘हामी नेपाल र म्यानमारको व्यापार, लगानी र पर्यटन प्रवद्र्धन गर्न चाहन्छौँ’, संघका अध्यक्ष शिवकुमार अग्रवालले भने,  ‘दुई देशबीच सिधा हवाई सम्पर्क हुनुपर्छ ।’