रोम, १६ पुस । इटलीको सिसिली टापूमा वर्षको अन्तिम दिन शुक्रबार ४४० जना आप्रवासी बोकेको एउटा उद्धार जहाजलाई अवतरणका लागि अनुमति दिइएको छ । सन् २०२१ मा इटालीको सिसिलीनजिकको किनार हुँदै कूल ६७ हजारभन्दा बढी मानिसले प्रवेश अनुमति पाएका इटलीले बताएको छ । इटलीको गैरसरकारी संस्थाले उद्धारका लागि सञ्चालन गरेको सी वाच–३ नामक जहाजका अधिकारीले ट्वीटरमार्फत जारी विज्ञप्तिमा भनेका छन्, “इटालेली अधिकारीहरूले सिसिलीको पोज्जालो बन्दरगाहलाई सी–वाच ३ जहाजका लागि अवतरण गर्ने स्थान तोकिएको छ । हाम्रो पहिलो उद्धार कार्य सकिएको एक हप्तापछि जहाजमा रहेका ४४० जना उद्धार गरिएका मानिसहरूलाई अन्ततः किनारामा जान दिइनेछ ।”उद्धारमा प्रयोग भएको जहाजले नोभेम्बर २०१७ देखि लिबियाको तटबाट सामुद्रिक गस्ती गर्दै आएको छ । यो गैर–लाभकारी समूहहरूद्वारा सञ्चालित धेरैमध्ये जहाज हो । इटलीको समुद्रमा जहाजहरूले आप्रवासीहरूलाई भूमध्यसागरको मध्यक्षेत्र पार गरेर युरोपमा पु¥याउने अक्सर भीड हुन्छ भने उनीहरूले समस्याग्रस्त जहाजहरूलाई मद्दत गर्ने गर्छन् । इटलीको गृह मन्त्रालयको डिसेम्बर ३१ मा अद्यावधिक गरिएको तथ्याङ्कअनुसार यसवर्ष कूल ६७ हजार ४० आप्रवासी इटाली भित्रिएका छन् । यो गत वर्ष रेकर्ड गरिएको ३४ हजार १५४ मा तीव्र वृद्धि हो । तर सन् २०१६ मा भने यो सङ्ख्या एक लाख ८१ हजार ४३६ रहेको थियो । संयुक्त राष्ट्रसङ्घीय शरणार्थी निकायले डिसेम्बर २६ मा अद्यावधिक गरिएको तथ्याङ्क अनुसार, यसवर्ष एक लाख १४ हजार ५८४ प्रवासी समुद्रबाट साइप्रस, ग्रीस, इटाली, माल्टा र स्पेनमा पुगेका छन् । गत वर्षको तुलनामा सामुद्रिक आगमन दर बढेको देखिन्छ ।– रासस/एएफपी