पुल्चोक (ललितपुर) ।  ललितपुर महानगर ३ नं. वडामा बिक्री हुने तरकारीमा विषादी प्रयोग भए नभएको परीक्षण हुने भएको छ । 
विषादीको प्रयोग भए नभएको परीक्षण गर्न वडाले विषादी परीक्षण केन्द्र सञ्चालन गरेको छ । उक्त केन्द्रको ललितपुर महानगर प्रमुख चिरीबाबु महर्जनले शनिवार उद्घाटन गरे । महानगर प्रमुख महर्जनले वडा नं. ३ ले वडावासीको स्वास्थ्यप्रति संवेदनशील भएर विषादी परीक्षण केन्द्र सञ्चालन गरेकोमा वडा कार्यालयलाई धन्यवाद दिए ।  वडा नं. ३ का वडाअध्यक्ष श्रीगोपाल महर्जनले विषादीको प्रयोग भएको तरकारीलगायत अन्य खानेकुराको प्रयोगले मानिसमा प्राणघातक रोगको जोखिम बढेको बताए । उनले भने, ‘वडावासीको स्वास्थ्यप्रति जिम्मेवारी बोध भएर यो केन्द्र सञ्चालनमा ल्याएका हौँ ।’ वडाले तरकारीको स्याम्पल कलेक्सन गरेर परीक्षण गर्ने उनले जानकारी दिए । उनले परीक्षण गर्दा विषादी प्रयोग भएको पुष्टि भए कारबाहीको प्रक्रिया अघि बढाउने बताए । तत्कालको लागि यो परीक्षण वडा नंं. ३ भित्र मात्रै गरिनेछ । उनले भने, ‘परीक्षणको लागि धेरै ठाउँबाट माग आएको छ, तर अहिले हाम्रो प्राथमिकता वडा नं. ३ मात्रै हो, क्षमता विस्तार गरेर मात्रै अन्य ठाउँकोलाई यो सुविधा दिन्छौं ।’ वडा नं. ३ ले विषादी रहित तरकारी विक्रीको लागि  छुट्टै बजार सञ्चालन गर्ने तयारी समेत गरेको छ ।

वडाअध्यक्ष श्रीगोपाल महर्जनले नागरिकको स्वास्थ्यलाई सधै प्राथमिकतामा राखेको बताउँदै चेतना स्तर बढाउन समेत वडाले सिर्जनशील काम गरेको बताए ।  ललितपर महानगर प्रमुख चिरीबाबु महर्जनले ललितपुर महानगरले जस्तै महानगरको वडा नं. ३ ले पनि देशभरका स्थानीय तहका अन्य वडाहरुले भन्दा पृथक काम गरेको दाबी गरे  । उनले भने, ‘ स्मार्ट सडक बत्ती हामीले पहिला जडान गर्‍यौं, हाइमास्ट बत्ती हामीले जडान गर्‍यौँ, साइकल लेन पहिला हामीले बनायौँ, म्यानमेड ग्रिनरी युक्त सहर हामीले पहिला बनायौँ भने जस्तै विषादी परीक्षण गर्ने केन्द्र सञ्चालन गर्ने काममा हाम्रो पालिकाको वडा नं. ३ पहिला भयो ।’  राष्ट्रिय परीक्षा वोर्डका अध्यक्ष महाश्रम शर्माले महानगरजस्तै वडा नं. ३ पनि उत्कृष्ट र पृथक काम गर्न अब्बल रहेको बताए । विषादी परीक्षण केन्द्र स्थापनाले नागरिकको स्वास्थ्य प्रति वडा संवेदनशील भएको पुष्टि गरेको उनले बताए ।  यसैगरी कार्यक्रममा २०८१ सालको एसइइ परीक्षा र कक्षा १२ को परीक्षामा उत्कृष्ट अंक ल्याई उत्तीर्ण हुने जेहेन्दार विद्यार्थीलाई प्रोत्साहन भत्ता समेत वितरण गरिएको थियो । ती विद्यार्थीलाई महानगर प्रमुख चिरीबाबु महर्जन, वडाअध्यक्ष श्रीगोपाल महर्जन र परीक्षा वोर्डका अध्यक्ष महाश्रम शर्माले प्रमाण पत्र, खादा र प्रोत्साहन भत्ता प्रदान गरेका थिए ।