रौतहट । जितिया पर्वको (नहायखाय) का लागि व्रतालुसँगै नदीमा नुहाउने क्रममा डुबेर एक बालिकाको मृत्यु भएको छ ।  गौर नगरपालिका–६ सवगढका ब्रतालुहरूसँगै लालबकैया नदीमा नुहाउन गएकी बालिकाको शनिबार बिहान डुबेर मृत्यु भएको प्रहरीले जानकारी दिएको छ । गौर नगरपालिका–६ बैजु साहको १० बर्षीया छोरी करिश्मा साह आमासँगै नुहाउने क्रममा शनिबार विहान डुबेर वेपत्ता भएको खवरपाए पछि नेपाली सेना, सशस्त्र प्रहरी, नेपाल प्रहरी तथा स्थानीयले खोजी गरेका थिए ।  शनिबार बिहानदेखि खोजी गरेपनि दिउँसो बालिकाको शव फेला परेको जिल्ला प्रहरी कार्यालय रौतहटका एसपी नेत्रमणी गिरीले जानकारी दिए । जितिया पर्वको (नहायखाय) अर्थात पवित्र जलाशयमा नुहाएर चोखो खाना खाने दिन भएको हुँदा व्रतालुसँगै बालिका पनि नदीमा नुहाउन गएको उनले बताए ।  उनका अनुसार बालिकाको शव पोष्टमार्टमका लागि प्रादेशिक अस्पताल गौरमा पठाइएको छ  । यसैगरी लालबकैया नदीमा पौडी खेल्न तथा नुहाउन गएका इशनाथ नगरपालिका–१ का १५ बर्षीय विगन साहको पनि शनिबार बिहान शव फेला परेको एसपी गिरीले बताए ।  गत विहीबार साथीहरूसँग लालबकैया नदीमा पौडी खेल्न गएका साहको शव ८ किलोमिटर दक्षिणतर्फ भारतीय क्षेत्रमा फेला परेको उनले बताए । साहको शव ल्याउन भारतीय प्रहरीसँग समन्वय भइरहेको र घरका सदस्यहरू त्यसतर्फ गएको जिल्ला प्रहरी कार्यलय रौतहटले जनाएको छ ।