सोसल मिडिया
Contact Us
युनिकोड
टाहाखेल (ललितपुर) । मध्यपुर थिमि नगरपालिका गोदावरीमा जारी प्रथम उपत्यकाव्यापी अन्तर पालिका खुल्ला मेयर कप फुटबल प्रतियोगिताको क्बार्टरफाइनलमा प्रवेश गरेको छ । गोदावरी १० टाहाखेल–झ्यालुन्टारस्थित गोदावरी बहुउद्देश्यीय रंगशाला सोमबार भएको एक मात्र खेलमा टोखा नगरपालिकालाई ४–० ले हराउँदै मध्यपुर थिमिले अन्तिम आठको स्थान पक्का गरेको हो ।
मध्यपुरको जितमा रोहन खड्गीले ह्याट्रिक पूरा गरे भने अर्को गोल कप्तान यमन राजवहाकको नाममा रह्यो । कप्तान यमनले २९ औं मिनेटमा गोल गर्दै टोलीलाई अग्रता दिलाएका थिए । रोहनले खेलको ३८ औं, ४१ औं र ९० इन्ज्युरी टाइममा गोल गरेका थिए । उनै रोहन खेलको प्लेयर अफ दि म्याच चुनिए र ट्रफिसहित ५ हजार रुपैयाँ टोखा नगरपालिकाका मेयर प्रकाश अधिकारीले हस्तान्तरण गरे । मध्यपुरले अब वैशाख २२ गते तारकेश्वर नगरपालिका र कीर्तिपुर नगरपालिकाबीचको विजेतासँग क्वार्टरफाइनलमा प्रतिस्पर्धा गर्नेछ ।
तारकेश्वर र कीर्तिपुरबीचको खेल मंगलबार दिउँसो ३ बजे सुरु हुनेछ । प्रतियोगितामा मध्यपुरसँगै नागार्जुन नगरपालिका, चन्द्रागिरी नगरपालिका, महालक्ष्मी नगरपालिका र दक्षिणकाली नगरपालिका क्वार्टरफाइनलमा पुगिसकेका छन् । उपत्यकाभित्रका १४ वटा पालिकाका १५ टोलीले प्रतियोगितामा भाग लिएका छन् । प्रतियोगिताको विजेताले ५ लाख र दोस्रोले ३ लाख रुपैयाँ पाउने छन् । यस्तै अनुशासित टिमलाई ५० हजार तथा उत्कृष्ट गोलकिपर, डिफेन्डर, फरर्वाड, सर्वाधिक गोलकर्ता र उत्कृष्ट प्रशिक्षकले जनही २५ हजार रुपैयाँ प्राप्त गर्नेछन् ।