ललितपुर । ललितपुरको महालक्ष्मी नगरपालिकाको ग्वार्काे–लामाटार सडक खण्डमा स्मार्ट सडक वत्ती जडान गरिएसँगै उक्त सडक झिलिमिली भएको छ । नगरपालिकाले नेपाल विद्युत प्राधिकरणसँगको लागत साझेदोरीमा उक्त सडक खण्डमा स्मार्ट सडक बत्ती जडान गरेको हो । जडान गरिएका स्मार्ट लाइटको आज बिहीबार उद्घाटन गरिएको छ ।

स्मार्ट सडक बत्तीको आज साँझ एक कार्यक्रमबीच महालक्ष्मी नगरपालिकाका प्रमुख हरिगोविन्द्र श्रेष्ठ, नेपाल विद्युत् प्राधिकरणका कार्यकारी प्रमुख कुलमान घिसिङ तथा नगर उपप्रमुख लक्ष्मी महर्जनले विद्युतिय माध्यामबाट संयुक्त रुपमा उद्घाटन गर्नुभयो । सडक बत्ती उदुघाटन कार्यक्रममा विद्युत प्राधिकरणका उच्च अधिकारी, आयोजना प्रमुख, वडा अध्यक्षहरु, कार्यपालिकाका सदस्यहरु, नगरपलिका का कर्मचारीहरु, समाजसेवी तथा आम–नागरिकहरुको उपस्थिति रहेको थियो ।

महालक्ष्मी नगरपालिकाले आर्थिक वर्ष ०७८-७९ को स्वीकृति वार्षिक कार्यक्रममा ग्वार्काे–लामाटार मूल सडकमा सडकबत्ती जडान कार्यका लागि एक करोड पचास लाख विनियोजन गरेको थियो । विद्युत् प्राधिकरणको प्राविधिक सहयोगमा तयार गरिएको लागत अनुमान २ करोड ४१ लाख ६५ हजारमध्ये प्राधिकरणबाट ४० प्रतिशत र नगरपालिकाबाट ६० प्रतिशतका लागत साझेदारीमा योजना कार्यान्वयन गर्ने गरी सहमति भएको हो ।

महालक्ष्मी नगरपालिका तथा विद्युत् प्राधिकरणबीच २०७९ जेठ २५ गते सहमति भएको थियो ।  सहमति अनुसार सडक बत्तीको संरचना निर्माणपछि त्यसको नियमित मर्मत सम्भार (५वर्षसम्म) नगरपालिकाले खर्च गरी गरी प्राधिकरणले प्राविधिक पक्षमा सहयोग गर्नुपर्नेछ ।

 
स्मार्ट सडक बत्ती प्रयोग गर्दा हुने विद्युत् खपत बापतको रकम महालक्ष्मी नगरपालिकाले प्राधिकरणलाई भुक्तानी गर्नुपर्नेछ । ५.५ किलोमिटर उक्त सडक खण्डको दुबैतर्फ गरी ३५७ वटा बत्ती जडान गर्नका लागि आवश्यक पर्ने स्थानमा ६२ वटा नयाँ पोल गाड्ने सहमति दुई पक्षबीच भएको थियो ।