आज हामी शब्दपाटी टिभिको ‘मेरो करियर’ श्रृंखलामा नेपाल सरकारका पूर्वस्वास्थ्य सचिव प्रा.डा. प्रविण मिश्रसँग कुराकानी गर्दैछौ । आफैंले बुझेर, जानेर भन्दा पनि बुबाले निर्णय गरिदिएर उनी डाक्टर भएका हुन्। प्रविणका बुबाले आफ्ना  पाँच भाइ छोरालाई  पालैपालो  ‘डाक्टर, इन्जिनियर, डाक्टर, इन्जिनियर र डाक्टर’ भनिदिए । पाँचै छोरा डाक्टर, इन्जिनियर नै बने ।
कक्षामा सधैं दोस्रो हुने प्रविण आफ्नो करियरमा सधैं पहिला भए । स्वास्थ्य मन्त्रालयमा सचिवको जिम्मेवारी सम्हाल्दा उनले स्वास्थ्य क्षेत्रमा महत्वपूर्ण निर्णय गरे । डाक्टरी पेशमा पनि उनी अब्बल रहे । बुबाले आफ्नो करियर छनोटमा गरेको त्यो निर्णयप्रति प्रविण कृतज्ञ छन् । बाको त्यो निर्णयलाई सफल बनाउन उनी सधैं मिहेनती भए । हिड्दैं गर्दा बाटोमा आउने नराम्रा कुरालाई पन्छाउँदै अघि बढे । सधैं सकारात्मक बने । मिहेनत र सकारात्मक कुरालाई सारथी बनाएका प्रविण त्यस्ता व्यक्ति हुन् जो नयाँ पुस्ताका लागि समेत प्रेरणा बन्न सक्छन् ।