लमजुङ :  लमजुङमा भूकम्पपछिको निजी आवास पुनर्निर्माणमा साढे तीन अर्ब खर्च भएको छ । विनासकारी भूकम्पमा भत्किएका आवास पुनर्निर्माणमा हालसम्म ३ अर्ब ५८ करोड ५६ लाख ५० हजार रुपैयाँ खर्च भएको राष्ट्रिय पुनर्निमार्ण प्राधिकरण जिल्ला आयोजना कार्यान्वयन इकाई, अनुदान व्यवस्थापन तथा स्थानीय पूर्वाधार लमजुङले जनाएको छ । जिल्लामा आवास पुनर्निर्माण नगर्ने भनी स्वेच्छाले २४ जनाले पहिलो किस्ताको ५० हजार र दुई जनाले दोस्रो किस्ता १ लाख ५० हजार रकम फिर्ता गरेको राष्ट्रिय पुनर्निर्माण प्राधिकरण जिल्ला आयोजना कार्यान्वयन इकाई,अनुदान व्यवस्थापन तथा स्थानीय पूर्वाधार लमजुङका फोकल पर्सन विनायक दवाडीले बताए । उनका अनुसार जिल्लामा हालसम्म १० हजार ४ सय ४४ लाभग्राहिले आवास पुनर्निर्माण सम्पन्न गरी तेस्रो किस्ताको रकम बुझिसकेका छन् भने दोस्रो किस्ता लिने लाभग्राहीको संख्या १२ हजार ६६ छ । जिल्लामा लाभग्राहीको संख्या १५ हजार ५ सय ७८ रहेको छ । हालसम्म पहिलो किस्ताबापत ५० हजारका दरले ७३ करोड १३ लाख ५० हजार रुपैयाँ निकास भैसकेको छ । त्यसैगरी दोस्रो किस्ताबापत १ अर्ब ८० करोड ९९ लाख र तेस्रो किस्ताबापत १ अर्ब ४४ करोड ४ लाख रकम खर्च भएको हो । जिल्लामा पुनर्निर्माण सुरु भएको चार वर्षमा ७४ प्रतिशत निजी आवास बनेकाे जिल्ला आयोजना कार्यान्वयन इकाई लमजुङले जनाएको छ ।