रसुवा । रक्षा बन्धनको विशेष पर्वका अवसरमा लाग्ने पवित्र तीर्थ गोसाइँकुण्ड मेला भर्नका लागि भक्तजन आउने क्रम जारी छ । कोभिड सङ्क्रमणका कारण गोसाइँकुण्ड क्षेत्र विकास समितिले औपचारिक मेला स्थगन गरे पनि आन्तरिकरूपमा भक्तजन गोसाइँकुण्ड गइरहेका छन् । जनै पूर्णिमा पर्वका लागि पवित्र कुण्डमा स्नानका लागि करिब दुई हजार भक्तजन निलाद्री पर्वतको तीर्थ प्रस्थान गरिसकेको जिल्ला प्रहरी कार्यालयका प्रमुख देवेन्द्र पाण्डेले जानकारी दिनुभयो । बढ्दो कोरोना सङ्क्रमणप्रति सजगता अपनाउँदै मास्क लगाउन, सामाजिक दूरी कायमको जागरण एवं धार्मिक मार्गको सुरक्षा व्यवस्था मजबुत पार्न प्रहरी निरीक्षकको नेतृत्वमा प्रहरी गस्ती परिचालन गरिएको प्रहरी प्रमुख पाण्डेले बताए । औपचारिकरूपमा मेला स्थगन भए पनि तीर्थका लागि एक्कासी यात्रुको चाप बढेका कारण उच्च भागमा लेक लागेर पर्न सक्ने समस्यालाई दृष्टिगत गरी सुरक्षा व्यवस्थाका साथै नेपाली सेनाको उद्धार टोलीसमेत तयार गरिएको प्रजिअ ईश्वरीप्रसाद ढकालले जानकारी दिए ।

सामाजिक दूरी कायम गराउने कार्यमा सशस्त्र प्रहरीसहितको सुरक्षा अङ्ग परिचालन गरिरहेको बताइएको छ । समुद्र मन्थन गर्दा निस्केको कालकुट सेवन गरी प्राणीजगत्लाई रक्षा गर्ने महादेव शिवको दर्शन गर्न जिन्दगीमा एकपटक भए पनि पुग्नैपर्ने धार्मिक मान्यताअनुरूप भक्तजनले विशेष पर्वमा स्नान गर्न निलाद्री पर्वत पुग्ने गरेका छन् ।  

कोरोनाले पूजापाठबाहेक अन्य कार्य बन्द  

यता, हुम्ला सदरमुकाम सिमकोटसहित जिल्लाका सातवटै गाउँपालिकामा रहेका विभिन्न शक्तिपीठमा धुमधामका साथ मनाइने साउने पूर्णिमा यो वर्ष कोरोना त्रासका कारण पूजापाठबाहेक अन्य कार्य पूर्णरूपमा बन्द गरिने निर्णय भएको प्रमुख जिल्ला अधिकारी गणेश आचार्यले बताए ।  हिजोदेखि जिल्लाका विभिन्न ग्रामीण बस्तीमा रहेका शक्ति पीठमा दुई दिनसम्म पूजापाठसहित आआफ्नै उमेर समूहका महिला पुरुष मिलेर देउडा खेल गरिने गरिन्छ । साथै सदरमुकाम सिमकोटमा साउन पूर्णिमाको पहिलो दिनदेखि लगभग पाँच दिनसम्म मनाउनुका साथै ठूलो पर्वका रूपमा लिएर जिल्लाभरका देउडा खेलाडी सहभागी भएर रमाइलो गरिने भए पनि यो वर्ष कोरोना सङ्क्रमणको हुम्ला उच्च जोखिममा रहेकाले सिमकोटमा रहेका विभिन्न शक्ति पीठमा सामान्य पूजापाठबाहेक अन्य कार्य बन्द गरिने भएको प्रमुख जिल्ला अधिकारी आचार्यले बताए ।  

प्रमुख जिल्ला अधिकारी आचार्यले भने, “हुम्ला सङ्क्रमणको उच्च जोखिममा छ, त्यसैले जिल्ला डिसिसिएमसीको बैठकले शक्ति पीठमा पूर्णस्वास्थ्य मापदण्ड पालना गर्न निर्देशन दिइएको र देउडा खेल बन्द गरिने भएको हो ।” जिल्लामा राति ९ बजेपछिदेखि सिमकोट बजार आवतजावतमा समेत बन्द गरिएको छ । रातिका समयमा मदिरा सेवन गरेर होहल्ला बढ्नुका साथै झगडा बढी हुने देखिएपछि ९ बजेपछि आवतजावतमा कडाइ गर्नुका साथै होटेल पसल बन्द गर्ने निर्णय गरिएको आचार्यले बताए ।  जिल्लामा रहेका विभिन्न शक्ति पीठमा दिउँसोका समयमा धामी नाच हुने गर्दछ भने साँझ परेपछि विभिन्न उमेर समूहका मिलेर देउडा खेलेर रमाइलो गर्ने गर्दछन् । तर यो वर्ष देउडा नहुने भएको हो । शुक्रबार बसेको जिल्ला सुरक्षा समितिको बैठकले साउन पूर्णिमा अवधिभर सिमकोट बजार क्षेत्रमा बाक्लोरूपमा सुरक्षा गस्ती परिचान गर्ने र विगतका वर्षजस्तो देउडा खेल खेल्न नपाइने प्रमुख जिल्ला अधिकारी आचार्यले बताए । सिमकोट बजारमा नेपाल प्रहरी र सशस्त्र प्रहरीको गस्तीसमेत बढाएको उनले बताए । हुम्लामा आजदेखि साउन पूर्णिमा मेला शुरु भएको छ ।–रासस