काठमाडौं । डिशहोमले नयाँ वर्ष २०८३ को अवसर पारेर इन्टरनेट सेवा तथा प्रत्यक्ष घरमा टेलिभिजन सेवाअन्तर्गत विस्तृत वार्षिक अफर सार्वजनिक गरेको छ । कम्पनीले बढ्दो सञ्चालन खर्च, सामग्री लागत तथा पूर्वाधार विस्तारका कारण मूल्य संरचनामा सामान्य समायोजन गरिए पनि ग्राहकलाई थप लाभ दिन बोनस आधारित योजना ल्याइएको जनाएको छ । कम्पनीका अनुसार, नयाँ योजना विशेषगरी वार्षिक नवीकरण बढाउने, उच्च गतिको इन्टरनेट प्रयोग विस्तार गर्ने तथा निष्क्रिय ग्राहकलाई पुनः सक्रिय बनाउने उद्देश्यले ल्याइएको हो । इन्टरनेट सेवाअन्तर्गत हालका ग्राहकका लागि वार्षिक रिचार्जमा अतिरिक्त बोनस दिनको व्यवस्था गरिएको छ, जहाँ सेवा बन्द हुनुअघि रिचार्ज गर्ने ग्राहकले थप बोनस अवधि प्राप्त गर्न सक्नेछन् । यसले नियमित ग्राहकलाई दीर्घकालीन योजनातर्फ आकर्षित गर्ने अपेक्षा गरिएको छ । त्यस्तै, लामो समयदेखि सेवा प्रयोग नगरेका ग्राहकलाई लक्षित गर्दै पुनः सक्रियता योजना ल्याइएको छ । कम्पनीका अनुसार तीस दिनभन्दा बढी सेवा बन्द गरेका ग्राहकले पुनः रिचार्ज गर्दा उच्च गतिको विभिन्न प्याकेजमा उल्लेखनीय बोनस प्राप्त गर्नेछन् । साथै, यस्ता ग्राहकका लागि ड्रपवायर तथा स्थानान्तरण शुल्क निःशुल्क गरिएको छ, तर अन्य अफरसँग संयोजन गर्न नपाइने व्यवस्था गरिएको छ । नयाँ जडानतर्फ कम्पनीले विशेषगरी उच्च गतिको इन्टरनेट प्रवर्द्धनमा ध्यान दिएको छ । दुई सय मेगाबिट प्रतिसेकेन्ड वा सोभन्दा माथिका वार्षिक योजनामा ग्राहकले १२ महिनाको भुक्तानीमा १४ महिनासम्म सेवा उपभोग गर्न सक्ने सुविधा प्रदान गरिएको छ । कम्पनीले यसलाई उच्च गतिको इन्टरनेट प्रयोग विस्तार गर्ने रणनीतिक पहलका रूपमा लिएको जनाएको छ । प्रत्यक्ष घरमा टेलिभिजन सेवाअन्तर्गत वार्षिक रिचार्जमा बोनस संरचना लागु गरिएको छ । नियमित तथा निष्क्रिय दुवै प्रकारका ग्राहकले वार्षिक रिचार्ज गर्दा दुई महिनासम्म अतिरिक्त सेवा प्राप्त गर्नेछन् भने सेवा बन्द हुनुअघि रिचार्ज गर्ने ग्राहकले थप एक महिना बोनस पाउनेछन् । यसरी अधिकतम तीन महिनासम्म बोनस उपलब्ध हुने कम्पनीले जनाएको छ । कम्पनीका अनुसार, उक्त टेलिभिजन सेवा अफर केवल वार्षिक बहु–टेलिभिजन योजनामा लागु हुनेछ भने मासिक तथा छोटो अवधिका योजनामा कुनै परिवर्तन गरिएको छैन । यसअघि सञ्चालनमा रहेका केही पुराना बोनस योजना पूर्ण रूपमा हटाइएको पनि उल्लेख गरिएको छ । साथै, रकम जम्मा गर्ने वा अनलाइन माध्यमबाट रिचार्ज गर्दा समान रूपमा अफर लागु हुने व्यवस्था गरिएको छ । दुवै सेवामा लागु हुने साझा सर्तहरूमा सबै अफर वार्षिक योजनामा मात्र सीमित रहने, रकम फिर्ताको अवस्थामा बोनस अवधि समायोजन गरिने तथा पुराना बोनस योजनाहरू प्रतिस्थापन गरिएको उल्लेख गरिएको छ । इन्टरनेट सेवा अफर चैत्र २०८२ को अन्त्यदेखि वैशाख २०८३ सम्म लागु हुनेछ भने नयाँ जडान योजना वैशाख महिनाभर लागु रहनेछ । टेलिभिजन सेवा अफर भने आषाढ २०८३ सम्म सञ्चालनमा रहने कम्पनीले जनाएको छ । कम्पनीकाअनुसार यस्ता बोनस केन्द्रित वार्षिक रणनीतिले ग्राहकबाट हुने औसत आम्दानी वृद्धि, छोटो अवधिका योजनाबाट वार्षिक योजनातर्फ ग्राहक आकर्षण, सेवा त्याग दरमा कमी तथा उच्च गतिको इन्टरनेट विस्तारमा सकारात्मक प्रभाव पार्न सक्छ । प्रतिस्पर्धात्मक बजारमा यस्ता योजनाले सेवा प्रदायकहरूबीच फरक पहिचान स्थापित गर्ने अपेक्षा गरिएको छ । कम्पनीले नयाँ वर्षको अवसरमा ल्याएको यो योजना ग्राहकलाई थप सेवा अवधि प्रदान गर्नुका साथै दीर्घकालीन ग्राहक धारण रणनीतिलाई सुदृढ बनाउने उद्देश्यले ल्याइएको जनाएको छ ।