काठमाडौं ।  सर्वोच्च अदालतको परमादेश अनुसार गठित  गैरआवासीय नेपाली संघ (एनआरएनए) उच्चस्तरीय समितिले महेश कुमार श्रेष्ठ नेतृत्वको कार्य समिति (आइसीसी) लाई ८३ लाख बढी नगद र केही जिन्सी सामग्री हस्तान्तरण गरेको छ । शुक्रबार ललितपुर कुपन्डोलस्थित होटेल हिमालयमा आयोजित हस्तान्तरण कार्यक्रममा उच्च स्तरीय समितिका तर्फबाट कुल आचार्य र सदस्य सचिव जानकी गुरुङलगायतले नवनिर्वाचित समितिका अध्यक्ष श्रेष्ठ र कोषाध्यक्ष ठाकुर ढुंगानालाई चेक र जिन्सि सामग्रीको फाइल हस्तान्तरण गरेको हो ।  सर्वोच्च अदालतको २० चैत २०८० को फैसलाअनुसार एनआरएनएमा देखिएको लामो समयदेखिको विवाद समाधान गर्न संघका पूर्वअध्यक्ष डा.शेष घलेको संयोजकत्वमा उच्चस्तरीय समिति गठन भएको थियो । सर्वोच्चको निर्देशनअनुसार समितिलाई ६ महिनाभित्र एकता महाधिवेशन सम्पन्न गर्न जिम्मेवारी दिइएको थियो । समितिको पहिलो बैठकले एकता महाधिवेशन काठमाडौँ आयोजना गर्ने निर्णय गरेको थियो । गत बैशाख २०–२१ (मे ३–४, २०२५) मा काठमाडौंको हायात होटेलमा आयोजित एकता महाधिवेशनले  सन् २०२५–२०२७ कार्यकालका लागि श्रेष्ठको नेतृत्वमा नयाँ कार्यसमिति सर्वसम्मतिले निर्वाचित गरेको थियो । सोही समितिलाई अधिवेशनबाट बचेको नगद र जिन्सी हस्तान्तरण गरिएको हो । हस्तान्तरण समारोहमा पूर्वअध्यक्षहरु डा.शेष घले, देवमान हिराचन, कुल आचार्यलगायत अभियन्ताहरु विनोद कुँवर, आरके शर्मा, नरेन्द्र रानाभाट, हालका महासचिव आरबी लामा, सचिव चिन्तामणि सापकोटालगायतले आफ्नो धारणा राखेका थिए ।