ललितपुर । राजश्व (कर) का दर र दायरा पुनरावलोकनका लागि गृहकार्य गरिरहेको ललितपुर महानगरपालिकाले विज्ञ टोलीसँग छलफल गरेको छ । आगामी आर्थिक ऐनमा यो विषयलाई समेट्ने गरी करको दर र दायारा पुनरावलोकनका लागि महानगरले विज्ञ समूहको परामर्श लिएर गृह कार्य गरिरहेको छ ।  त्रिवि केन्द्रीय अर्थशास्त्र विभागका प्राध्यापकहरूसँगको सहकार्यमा महानगरले करको दर र दायराका बारेमा अध्ययन गरिरहेको छ । स्थानीय राजश्व परामर्श समितिका संयोजक एवम् महानगर उपप्रमुख मञ्जली शाक्य बज्राचार्यसहित समितिका सदस्य तथा राजश्व प्रशासन महाशाखामा कार्यरत कर्मचारीहरूमाझ विज्ञ टोलीले महानगरको करको दर र दायरा समयानुकुल भए-नभएको, दर र दायरा बढाउन सकिने क्षेत्रसहितका विषयमा प्रस्तुति दिएका थिए । टोलीले काठमाडौं महानगरपालिका, भरतपुर महानगरपालिका तथा छिमेकी महालक्ष्मी नगरपालिकाका राजश्वका दरहरूको तुलनात्मक अध्ययन गरिरहेको छ ।