काठमाडौं ।  नेपाली राष्ट्रिय क्रिकेट टोलीका कप्तान रोहित कुमार पौडेलले आइसीसी विश्वकप छनोट अन्तर्गत वेस्टइन्डिजविरुद्ध फिल्डीङ खराब हुनु नै हारको मुख्य कारण रहेको बताएका छन् ।
रोहितले टस जितेर फिल्डीङ रोजेपछि टोलीले राम्रो सुरुवात पाएको बताए । तर मैदानमा क्याच समाउन नसक्दा असर गरेको उनको बुझाइ थियो । ‘मलाई लाग्छ हाम्रो बलरले राम्रो सुरुवात दिए । हामीले केहि महत्त्वपूर्ण क्याच गुमायौं । त्यो क्याच समाएको भए खेल फरक हुन सक्थ्यो । हामी सामान्यतया राम्रो फिल्डीङ गर्ने टोली हौं, तर हामीले आज क्याच ड्रप गर्न पुग्यौं । त्यसपछि पुरन र होपले राम्रो ब्याटिङ गरे,’ उनले भने ।
नेपालले वेस्ट इन्डिजका तीव्र गतिका बलरको सामना गर्न निकै संघर्ष गर्नुपरेको थियो । विशेषगरी सर्ट बलविरुद्ध ब्याटरहरुले खुलेर खेल्न सकेका थिएनन् । कप्तान रोहिले विपक्षी बलरको प्रशंसा गरे । ‘वेस्ट इन्डिजले निकै राम्रो बलिङ गर्यो । हामीले बलको पेसलाई आफ्नो फाइदामा प्रयोग गर्न सकेनौं । तर कठिन समयमा आरिफ र गुलशनले निकै राम्रो खेले । १२९–६ को स्थितिबाट २३०–४० को स्थितिमा पुग्नु राम्रो नै हो । अर्को खेलमा सर्ट बलविरुद्ध अझ राम्रो खेल्ने प्रयास गर्नेछौं,’ उनले थपे ।
कप्तान रोहितले टेस्ट टोलीविरुद्ध कप्तानी गर्दा आफूले पनि धेरै सिक्न पाएको बताए । ‘टेस्ट टोलीविरुद्ध खेलेर मैले आफैं पनि धेरै सिक्न पाएँ । हरेक खेलमा तपाईं हरदम तयार रहनुपर्ने हुन्छ । कुनैपनि खेललाई हल्का लिने छुट हुँदैन । विपक्षीले कुनै अवसर पाएको अवस्थामा त्यसको भरपुर फाइदा उठाउन सक्छन् । हामीले त्यसमा थप ध्यान दिनुपर्ने बुझेका छौं,’ कप्तान रोहितले प्रष्ट पारे ।
रोहितले लिग चरणको अन्तिम खेलमा नेदरल्यान्ड्सविरुद्ध जित हासिल गरेर अर्को चरणमा पुग्ने सोच रहेको बताए । ‘हामी अब त्यसै खेललाई कुरिरहेका छौं । त्यो खेल जितेमा हामी सुपर सिक्समा पुग्न सक्नेछौं । हामी राम्रो प्रदर्शन गर्ने लक्ष्यसहित त्यस खेलमा जानेछौं,’ उनले टुंग्याए ।
नेपाल वेस्ट इन्डिजसँग पराजित
नेपाल आइसिसी विश्वकप छनोटमा चार पटकको विश्वकप विजेता वेस्ट इन्डिजसँग १ सय १ रनको फराकिलो अन्तरले पराजित भएको छ । जितको लागि ३ सय ४० रनको विशाल विजयी लक्ष्य पछ्याएको नेपाल ४९.४ ओभरमा २ सय ३८ रनमा अल आउट भयो ।
नेपालका लागि आरिफ शेखले ९३ बलमा ४ चौका र १ छक्कासहित सर्वाधिक ६३ रन बनाए । त्यो रन जितको लागि पर्याप्त हुन सकेन । गुलशन झा ५८ बलमा ५ चौका र १ छक्कासहित ४२ रनमा आउट भए । नेपालका करण केसीले २७ बलमा ४ चौका र १ छक्कासहित २८ रन बनाए । नेपालका ब्याटर वेस्ट इन्डिजको बाउन्सर सामु धेरै समय क्रिजमा टिक्न सकेनन् ।
तीव्र गतिका बलर अल्जारी जोशेफको दोस्रो ओभरको चौथो बलमा ओपनर कुशल भुर्तेल पाँच रनमा बोल्ड आउट भए । जेसन होल्डरको पाँचौं ओभरको दोस्रो बलमा स्कुप खेल्न धुनमा भीम सार्की टप एज लागेर विकेटकिपर शाई होपबाट क्याच आउट हुन पुगे ।
जेसन होल्डरको बाउन्सर बलमा कप्तान रोहित पौडेल डिप फाइन लेगमा बैकल्पिक फिल्डर केसी कार्टीबाट क्याच आउट भएका थिए । रोहितले ४३ बलमा ३ चौकासहित ३० रन बनाए । कुशल मल्ल २ रनमा क्याच आउट भए । अकिल हुसैनको बलमा केसी कार्टीले सानदार क्याच लिँदै कुशललाई पेभेलिएन फर्काएका थिए ।
दीपेन्द्र सिंह ऐरी २० बलमा २ चौका र १ छक्कासहित २३ तथा आसिफ शेख ३६ बलमा ३ चौकासहित २८ रनमा आउट भए ।
वेस्ट इन्डिजका जेसन होल्डरले १० ओभरमा ३४ रन खर्चेर ३ विकेट लिए ।
अकिल हुसैनले १० ओभरमा १ मेडनसहित ४९ रन खर्चेर २ विकेट लिए । अल्जारी जोशेफले १० ओभरमा ४५ रन खर्चेर २ विकेट लिए । किमो पलले १० ओभरमा १ मेडनसहित ६३ रन खर्चेर २ विकेट लिए ।
त्यसअघि हरारे स्पोर्ट्स क्लबमा टस हारेर पहिला ब्याटिङको निम्तो पाएको वेस्ट इन्डिजले निर्धारित ५० ओभरमा ७ विकेट गुमाउँदै ३ सय ३९ रन बनाएको थियो । वेस्ट इन्डिजको जितमा कप्तान शाई होपले १ सय २९ बलमा १० चौका र ३ छक्कासहित १ सय ३२ रनको कप्तानी इनिङ खेले ।
त्यस्तै निकोलस पुरन ९४ बलमा १० चौका र ४ छक्कासहित १ सय १५ रनमा आउट भए । पुरनको यो ओडिआई करिअरको दोस्रो र होपको १५ औं शतक हो ।
पुरनले शतक बनाउन दुई जीवनदान पाएका थिए । विकेटकिपर आसिफ शेखले पुरनलाई ब्यक्तिगत ३ र ५४ रनमा क्याच ड्रप गर्दै जीवनदान दिएका थिए । त्यो हारको एक कारण बन्यो ।
एक समय वेस्ट इन्डिज १५.३ ओभरमा ५५–३ को अवस्थामा थियो । तर चौथो विकेटका लागि पुरन र होपले २ सय १६ रनको दोहोरो शतकीय साझेदारी गर्दै खेलमा फर्काएका थिए । यी दुई खेलाडीको साझेदारी दीपेन्द्रले तोडेका थिए । दीपेन्द्रले ४४ औं ओभरको अन्तिम बलमा पुरनलाई कट एन्ड बोल्ड गर्दै पेभेलिएन फर्काएका हुन् । दीपेन्द्रले एक हातले उत्कृष्ट क्याच लिएका थिए ।
नेपालले सुरुवात भने सानदार गरेको थियो । ओपनर कायल मेयर्सलाई १ र जोनसन चाल्र्स डक आउट भएका थिए । ब्रेन्डन किंग ४२ बलमा २ चौका र २ छक्कासहित ३२ रनमा आउट भए । रोभम्यान पावेल १४ बलमा ३ चौका र १ छक्कासहित २९ रनमा आउट भए । किमो पल १ रनमा आउट हुँदा जेसन होल्डर १० बलमा २ चौकासहित १६ रनमा नट आउट रहे ।
नेपालका स्पिनर ललित नारायण राजवंशीले १० ओभरमा ५२ रन खर्चेर सर्वाधिक ३ विकेट लिए । ललितले नेपालको पहिलो र अन्त्य दुबै ओभर गरेका थिए । सन्दीप लामिछानेले १० ओभरमा १ मेडनसहित ५० रन खर्चेर १ विकेट लिए । दीपेन्द्रसिंह ऐरीले ७ ओभरमा ४५ रन खर्चेर १ विकेट लिए । करण केसीले १० ओभरमा १ मेडनसहित ८१ रन खर्चेर १ विकेट लिए । गुलशन झाले ८ ओभरमा ६४ रन खर्चेर १ विकेट लिए ।
नेपाल पहिलो खेलमा जिम्बावेसँग ८ विकेटले पराजित भएको थियो । अमेरिकालाई ६ विकेटले हराएको थियो । अमेरिका समूह ए बाट लगातार तीन हारको साथ बाहिरिएको छ । नेपाल सुपर सिक्समा पुग्न शनिबार नेदरल्यान्ड्सलाई हराउनु पर्ने हुन्छ । नेपालले हराए मात्रै हुँदैन नेदरल्यान्ड्सले अन्तिम खेलमा वेस्ट इन्डिजसँग पनि हार्नुपर्ने हुन्छ । नेपाल नेदरल्यान्ड्ससँग पराजित भएमा समूह चरणबाटै बाहिरिनेछ ।