ललितपुर । गोदावरी नगरपालिकाले नगरभित्रका व्यवसायिक किसानलाई बोयर जातको बोका दिएको छ । नगरपालिकाले ‘फिप्टी फिप्टी’को अवधारणा अनुसार बाख्राको नस्ल सुधार्न र उन्नत जातको पाठापाठी उत्पादन गर्न बोयर जातका १३ वटा बोका व्यवसायिक किसानलाई दिएको हो ।  नगरपालिकामा आयोजित कार्यक्रममा नगर प्रमुख गजेन्द्र महर्जनले किसानलाई बोका हस्तान्तरण गरे । 
गोदावरी नगरपालिका पशु शाखाका अनुसार एउटा बोकालाई सरदर ४८ हजार रुपैयाँ परेको छ । ४८ हजारको ५० प्रतिशत किसानले बेहोरेका छ्न् भने ५० प्रतिशत नगरपालिकाले लगानी गरेको छ । नगर प्रमुख महर्जनले किसानको आर्थिक अवस्था सुधार गर्नका लागि नगरपालिकाले ल्याएको  ‘फिप्टी फिप्टी’को अवधारणा अनुसार बोका उपलब्ध गराएको बताए । उनले भने, ‘उहाँहरुको नि लगानी हुँदा अपनत्व महसुुस हुने भयो, त्यसैले यो अवधारणामा काम गरेका हौं ।’ 

किसानको आवश्यकता र मागलाई नगरले प्राथमिकतामा राखेको उनले बताए । नगरपालिकाले उत्पादन वृद्धि गर्दै किसानको आर्थिक अवस्था सुधार गर्न विभिन्न कार्यक्रम आयोजना गरेको छ । 
नगरपालिकाले अघिल्लो वर्ष  यो जातको १४ वटा वोका किसानलाई दिएको थियो  । अघिल्ला वर्षको कार्यक्रम प्रभावकारी भएकाले यो वर्षपनि यसलाई निरन्तरता दिएको पशु शाखा प्रमुख ईश्वरप्रसाद घिमिरेले बताए । 
उनले भने, ‘हस्तान्तरण गरेको बोकामा बोयरको जातीय गुण ७५ प्रतिशत छ, यसबाट उत्पादन हुने पाठपाठी हृष्टपुष्ट हुन्छन्, बलिया र मोटाघाटा हुन्छन्, तिनको बिक्री वितरणबाट किसान लाभान्वित हुनुहुन्छ ।’ 
नगरपालिकाले बोका उपलव्ध गराउनु अघि इच्छुक कृषकहरुको आवेदन माग गरेको थियो । उनका अनुसार निवेदन प्राप्त भएपछि छलफल गरेर बोका दिइएको हो । गोदावरी नगरपालिकामा १४ वटा वडाहरु छन् । यो पालिकाको केही वडाहरु कृषि र पशुपालनलाई प्रमुख पेशा बनाएका किसानहरूको बसोबास रहेको छ ।