ललितपुर । गोदावरी नगरपालिकाको वडा नं १० बोहराटारमा ज्येष्ठ नागरिक दिवा सेवा केन्द्र निर्माण हुने भएको छ । राधा सर्वेश्वरधामसँग निर्माण हुने उक्त दिवा सेवा केन्द्रको शनिबार गोदावरी नगरपालिकाका प्रमुख गजेन्द्र महर्जनले शिलान्यास गरे । ज्येष्ठ नागरिकका लागि निर्माण गर्न लागिएको यो भवन साढे दुई तल्लाको हुनेछ ।
नगर प्रमुख गजेन्द्र महर्जनले ज्येष्ठ नागरिकलाई दिउँसोको समय बिताउन सजिलो होस् भन्दै नगरपालिकाले प्रत्येक वडामा यस्ता केन्द्र निर्माणको अवधारणा ल्याएको बताए ।

निर्माण कार्य अन्तिम चरणमा पुगेको सर्बेश्वर मन्दिर ।

ज्येष्ठ नागरिकको सम्मानका लागि दिवा सेवा केन्द्र निर्माण गरेको प्रष्ट पार्दै केन्द्रले ज्येष्ठ नागरिकको दैनिकी सजिलो बनाउने उनले दाबी गरे । उनले भने, ‘परिवारका सदस्य पढाई र जागिरको कारण दिनभर घर बस्ने अवस्था नहुन सक्छ, त्यो अवस्थामा घरमा एक्लै बस्दा एक्लोपन र दिक्दारी महुसस नहोस् भनेर केन्द्र बनाएका हौं, दिनभर आमाबुबाले यहाँ आएर समय व्यतित गर्न सक्नुुहुन्छ ।’ यी केन्द्रले ज्येष्ठ नागरिकलाई खुशी राख्न सहयोग गर्ने दाबी उनले गरे । केन्द्रमा ज्येष्ठ नागरिकले भजनकीर्तन गर्न सक्छन् । ज्येष्ठ नागरिकले केन्द्रमा आएर आफ्नो अनुभव आदानप्रदान गर्न सक्ने महर्जनले बताए । गोदावरी नगरपालिका प्रत्येक वडामा ज्येष्ठ नागरिक दिवा सेवा केन्द्र निर्माणको अवधारणा अघि सारेको छ । जस अनुसार वडा नंं.१२, ११, १४ मा यो केन्द्र निर्माण भइसकेको छ । नगरपालिकाले उक्त केन्द्र निर्माणका चालु आर्थिक वर्षमा २० लाख बजेट विनियोजन गरेको छ । विनियोजित बजेटबाट काम सुरु गरेको नगरपालिकाले जनाएको छ ।

वडा नंं.१० का वडा अध्यक्ष शेखर न्यौपानल यो केन्द्र शारीरिक र मानसिक स्वास्थ्यसँग जोडिएको विषय भएको बताए । उनले भने, ‘ उहाँहरुको सम्मानमा हामीले यो केन्द्र बनाएका हौ, घरमा एक्लै बस्नु भन्दा केन्द्र आएर बस्दा बुवाआमा फ्रेस हुनुहुन्छ । ’
वडाअध्यक्ष न्यौपानेका अनुसार भवनमा ज्येष्ठ नागरिकको नियमित स्वास्थ्य परीक्षण गरिनेछ । ज्येष्ठ नागरिकको जमघट स्थलको रुपमा भवनलाई व्यवस्थित गरिने उनले जानकारी दिए । ज्येष्ठ नागरिक दिवा सेवा केन्द्रको भवन निर्माण स्थलसँगै नगरपालिकाले निर्माण गरिरहेको राधासर्बेश्वरधाम अन्तर्गत सर्बेश्वर मन्दिरको निर्माण कार्य अन्तिम चरणमा पुगेको छ । यो क्षेत्र वडा नं.१० को मात्रै नभएर गोदावरी नगरपालिकाको नै आकर्षक क्षेत्रमा रुपान्तरण भएको छ ।