काठमाडौं । पर्सि शुक्रबार हुने उपराष्ट्रपति पदको निर्वाचनका लागि मंगलबार राति १२ बजे मौन अवधि सुरु भएको छ । निर्वाचन आयोगले गएराति १२ बजेदेखि निर्वाचन प्रचारप्रसारमा निषेध गरेको छ । मतदान हुने दिनभन्दा ४८ घण्टा अगावैदेखि मतदान केन्द्र बन्द नहुन्जेलसम्म प्रचारप्रशार निषेधको अवधि लागू हुने छ । निर्वाचनका लागि आयोगले फागुन १७ गतेदेखि चैत ५ गतेसम्म कायम रहने गरी निर्वाचन आचारसंहिता जारी गरेको छ । 
आचारसंहिताबमोजिम निर्वाचनलाई स्वच्छ, स्वतन्त्र, निष्पक्ष, विश्वसनीय, पारदर्शी तथा भयमुक्त वातावरणमा सम्पन्न गर्न निषेधको अवधि लागू हुने आयोगका प्रवक्ता शालिग्राम शर्मा पौडेलले जानकारी दिए । मौन अवधिमा निर्वाचन प्रचारप्रसार लगायत कुनै पनि प्रकारका छलफल, अन्तरक्रिया, सभा, सम्मेलन, कार्यशाला, गोष्ठी आदि गर्न पाइने छैन ।
त्यस्तै उम्मेदवारको पक्ष वा विपक्षमा कुनै पनि प्रकारको प्रचारप्रसार गर्न, मत माग्न, एसएमएस, फेसबुक, भाइबरजस्ता सामाजिक सञ्जालबाट मत माग्न, आचारसंहिता विपरीत वक्तव्य दिन, प्रेस विज्ञप्ति निकाल्न, प्रकाशन तथा प्रसारण गर्न, सञ्चारमाध्यमबाट जीतरहारको पूर्वानुमानका सामग्रीहरू प्रसारजस्ता कार्य गर्न नहुने आयोगले जनाएको छ ।
उपराष्ट्रपतिमा एमालेकी अष्टलक्ष्मी शाक्य जसपाकी प्रमिला कुमारी यादव, जनमत पार्टीकी ममता झा र जसपाका रामसहायप्रसाद यादवले उम्मेदवारी दर्ता गराएका छन् । प्रमिला कुमारीले आफ्नो समर्थन यादवलाई रहने घोषणा गरेकी छन् ।