ललितपुर । ललितपुर महानगरका प्रमुख चिरीबाबु महर्जनले माघ १ गते भएको यति एयरलाइन्सको विमान दुर्घटनाप्रति दुःख व्यक्त गर्दै हवाई नीति परिमार्जन गर्न माग गरेका छन् । 
सोमबार महानगरद्धारा जारी विज्ञप्ति भनिएको छ, ‘ विद्यमान हवाईसँग सम्बन्धी नीतिनियमको कडाईका साथ पालना गर्न, परिमार्जन र पुनः मूल्यांकन गर्न समेत अनुरोध गर्दछु ।’ दुर्घटनाको कारण पहिचान गर्न संघीय सरकारले गठन गरेको समितिले निकालेको निष्कर्ष ठोस र भविष्यमा यस्ता दुर्घटना दोहोरिन नदिन सजगता अपनाउन मार्ग निर्देशन गर्न सक्ने होस भन्दै सुझाव दिएका छन् । नगरप्रमुख महर्जनले यस्ता घटना हुन नदिन सरोकारवाला निकायबीच छलफल र सहकार्य गर्नुपर्ने समेत बताएका छन् । 

आइतबार  बिहान पोखरामा भएको यति एयरलाइन्सको विमान दुर्घटनामा ७२ जनाको मृत्युभएको थियो । 
दुर्घटनामा आफन्त गुमाएका नेपाली तथा विदेशी नागरिकका शोक सन्तप्त परिवारजनमा समवेदना व्यक्त गर्दै उनले धैर्यधारण गर्ने शक्ति मिलोस् भन्दै कामना गरेका छन् । उनले दिवंगत आत्माको चीरशान्तिको कामना गर्दै हार्दिक श्रद्धाञ्जलि अपर्ण गरेका छन् ।