ललितपुर   ललितपुर महानगरले स्थानीय स्तरमा हुने विवाद समाधानका लागि मेलमिलाप केन्द्र संचालन गरेको छ । 
महानगरको वडा नं।२ कार्यालयमा खोलिएको केन्द्रको बुधबार नगर उपप्रमुख मंजली शाक्य बज्राचार्यले उद्घाटन गरिन् । ललितपुर महानगरमा २९वटा वडाहरु छन् । अन्य वडाहरुमा पनि मेलमिलाप केन्द्र संचालनमा ल्याउने तयारी भइरहेको छ । केन्द्रको उद्घाटन गर्दै उपप्रमुख मंजली शाक्य बज्राचार्यले रुपान्तरणसहितको समाज निर्माणका लागि मेलमिलाप महत्वपूर्ण भएको बताइन् । विवादको अन्तरवस्तु बुझेर समाधान गर्नु पुण्यको काम भएको बताउँदै मेलमिलापले समाजलाई सकारात्मक दिशामा लैजाने प्रष्ट पारिन् । उनले भनिन् , ‘ प्रत्येक समस्याको समाधान हुन्छ, मेलमिलापले पहाडलाई तिल बनाउँछ, यो कानुनी विषय मा त्रै होइन, सामाजिक कार्य हो, पुण्यको काम हो । 

 महानगरका प्रमुख प्रशासकीय अधिकृत गणेश अर्यालले मेलमिलाप केन्द्रको सुरुवात हुनु उदाहरणीय र अनुकरणीय काम भएको बताए । न्यायिक प्रक्रियामा मेलमिलाप महत्वपूर्ण तत्व भएको प्रष्ट पार्दै मेलमिलापले विवादमा रहेका दुबै पक्षले जित्ने बताए ।  ललितपुर महानगर वडा नं।२का वडा अध्यक्ष राजेश महर्जनले मेलमिलाप केन्द्रले विवाद समाधान गरेर मेलमिलाप गराउन निर्वाह गर्ने भूमिका महत्वपूर्ण भएको दाबी गरे । उनले भने, ‘मेलमिलाप केन्द्रले सियोको काम गर्छ, दुबै पक्षलाई जितेको अनुभव गराउँछ ।’ 
ललितपुर महानगर कानुन महाशाखाका प्रमुख खगेन्द्र प्रसाद वस्तीले विवादको समाधान मेलमिलाप भएको बताए । महानगरले विषयको महत्व र गम्भीरता बुझेर वडा पिच्छे नै मेलमिलाप केन्द्र संचालनको कार्य सुरु गरेको बताए । सेवाग्राहीको सहजताको लागि केन्द्रलाई वडा तहसम्म विस्तार गरिएको उनको भनाई थियो । स्थानीय शासन संचालन ऐन २०७४ को दफ ४७ का अधिकार संचालन गर्ने सन्दर्भमा विवादलाई वडा तहमा नै समाधान गर्नका लागि यो केन्द्रको अवधारणा सुरु भएको हो । उक्त ऐन अन्तर्गत उपप्रमुखको संयोजकत्वमा प्रत्येक स्थानीय तहमा न्यायिक समिति गठन गर्नुपर्ने व्यवस्था छ । न्यायिक समितिका सदस्य सरस्वती जोशी थापाले मेलमिलापकर्ता वकिल नभई सहजकर्ता भएको बताइन् । मेलमिलाप केन्द्रले सेवाग्राहीलाई घर नजिकैबाट समस्याको समाधान गर्न सहयोग गर्ने बताए  । यसैगरी कार्यक्रममा नगरप्रमुख तथा न्यायिक समितिकी संयोजक मंजली शाक्यले मेलमिलापकर्तालाई सपथ गराएकी थिइन् । महानगरले मेलमिलापकर्तालाई वडा तहमा तालिम दिएको थियो ।