सुनाकोठी (ललितपुर) । ललिपतुर महानगरपालिका २७ नं वडा सुनाकोठीस्थित बालकुमारी चौर अहिले योगमय भएको छ । विगत तीन दिनदेखि बालकुमारी चौरमा निःशुल्क योग विज्ञान शिविर भइरहेकोले यो क्षेत्र योगमय भएको हो । महिला पतन्जली योग समिति नेपालका केन्द्रीय प्रभारी पुज्य साध्वी देवादितीको प्रमुख प्रशिक्षकत्वमा सप्ताह व्यापी निःशुल्क योग विज्ञान शिविर बिहान ५ बजेदेखि ७ बजेसम्म चलिरहेको छ ।  शिविरको आज तेस्रो दिन हो ।  तेस्रो दिनको कार्यक्रम पनि सफलता पूर्वक सम्पन्न भएको छ ।

भोलिदेखि ललितपुर पतञ्जलिमा आवद्ध योग गुरुहरूले प्रवचनसहित योगाभ्यास गराउने छन् । महिला पताञ्जलि योग समिति नेपाल तथा युवा नेपाल समितिको सयुक्त आयोजनामा शिविर आयोजना गरिएको हो ।  शिविरको सहआयोजकका रुपमा ललितपुर महानगरपालिका वडा नं २६ तथा वडा नं २७ हुन् ।  पतञ्जली योग समिति नेपालका केन्द्रीय प्रभारी साध्वी  देवादितिले तीनदिन सम्म योगको महत्व, खानपान, रोगका उपचार विधि, जीवन शैलीका बारेमा योग साधक साधिकासहित सर्वसाधारणलाई बुझ्ने भाषा शैलीमा प्रवचनसहित योगाभ्यास गराएकी थिइन् । शिविरमा ललितपुर जिल्लामा क्रियाशील योग साधाना केन्द्र तथा बालकुमारी चौर आसपासका सर्वसाधारणको उपस्थिति रहेको थियो ।