इक्केडर । इक्वडोरको दक्षिण तटीय क्षेत्रमा गएको एउटा भूकम्पका कारण कम्तीमा १३ जनाको ज्यान गएको छ भने कैयौँ शहरका भवनहरूमा क्षति पुगेको छ ।
भूकम्पको धक्का उत्तरी पेरुमा समेत महसुस गरिएको थियो। त्यहाँ सीमावर्ती प्रान्तमा घर भत्किँदा एकजना किशोरीको निधन भएको जनाइएको छ ।
इक्वडोरको आधा प्रान्तहरूमा भूकम्पको प्रभाव महसुस गरिएको थियो । यूएस जिओलोजिकल सर्भेले उक्त भूकम्प ६ दशमलव ८ म्याग्निट्यूडको रहेको जनाएको छ । दक्षिणी प्रान्त एल ओरो सबैभन्दा नराम्रोसँग प्रभावित भएको बताइएको छ।
आपत्कालीन सेवाले मानिसहरू अझै पनि भत्किएका घरहरूमा फसिरहेको जनाएका छन् ।
क्षतिको विवरण के छ ?
सामाजिक सञ्जालमा राखिएका भिडिओमा स्थानीय बासिन्दाहरूले भग्नावशेषहरू हटाएर खोजी कार्य जारी राखेको देख्न सकिन्छ । स्थानीय समय अनुसार लगभग मध्य दिनमा भूकम्प गएको थियो ।
भूकम्पको केन्द्रबिन्दु इक्वडोरको दोस्रो ठूलो शहरभन्दा ८० किलोमिटर टाढा बलाओ भन्ने स्थान नजिकै रहेको विवरण आएका छन् । उक्त शहरमा झन्डै ३० लाख मानिसको बसोबास छ ।
एकजना प्रत्यक्षदर्शीले एएफपी समाचार संस्थासँग भने, “मानिसहरू आत्तिएर दौडिरहेको र आफ्नो कारबाट बाहिर निस्किरहेको देखेपछि म पनि सडकमा निस्किए ।”

इक्वडोरका राष्ट्रपति गियरमो लासोले मानिसहरूलाई शान्त रहन अनुरोध गरेका छन् । उनले प्रभावित क्षेत्रमा आपत्कालीन टोलीहरू खटाइएको पनि जानकारी दिए ।
उनको कार्यालयले घाइतेहरूको उपचार भइरहेको जानकारी दिएको भएपनि थप विवरण उपलब्ध गराएको छैन ।
पहिरोले कैयौँ सडक अवरुद्ध भएका छन् भने भूकम्पपछि कैयौँ घर, शिक्षण संस्था र स्वास्थ्य केन्द्रहरूमा पनि क्षति पुगेको छ ।
सन् २०१६ मा झन्डै ७ सय जनाको ज्यान लिने गरी इक्वडोरमा भूकम्प गएको थियो । त्यसबेला हजारौँ घाइते भएका थिए । पछिल्लो भुइँचालो त्यसयताकै सबैभन्दा शक्तिशाली भूकम्प रहेको जनाइएको छ ।–एजेन्सी