काठमाडौं । नेपाली कांग्रेसका सभापति शेरबहादुर देउवाले नेपाल जलवायु परिर्वतनको सबै भन्दाबढी जोखिममा रहेको भन्दै त्यसलाई नीतिगत रुपमै सम्बोधन गर्न आवश्यक रहेको बताएका छन् । 
काठमाडौंमा आयोजित पोलिसी हाकाथन अन इकोनोमी एण्ड क्लाइमेट एक्सन कार्यक्रममा उनले विश्वकै सबैभन्दा अग्ला हिमाल रहेको नेपालका हिमालय पग्लिने क्रम बढेको भन्दै त्यसलाई रोक्न आवश्यक नीतिगत व्यवस्था जरुरी रहेको औंल्याए । 
‘कार्वन उत्र्सजनलाई न्यूनिकरण गर्न, प्रतिकुल परिस्थिति अनुकुल गर्न र व्यक्तिको अभ्यासमा परिर्वतन गर्न जरुरी छ’, उनले भने, ‘नेपाली कांग्रेसले यस विषयलाई सदैव प्राथमिकतामा राख्दै आएको छ । संसारकै सबैभन्दा अग्ला हिमालहरु भएको देश हाम्रो पर्यावरणका लागि महत्वपूर्ण छ । त्यसैले नीतिगत कुरासंग जोडेर यसलाई प्राथमिकता साथ अघि बढाउनु पर्नेछ ।’
नेपाल जलवायु परिर्वतन सबैभन्दा बढी मारमा परेको भन्दै उनले अतिवृष्टि अनावृष्टिलगायतका समस्या बढेको भन्दै त्यसको न्यूनिकरणका लागि आवश्यक भूमिका खेल्न तयार रहेको बताए । 
उनले युवाहरूले जलवायु परिर्वतनका विषयमा उठाएका सवालहरु महत्वपूर्ण रहेको भन्दै त्यसलाई नीतिगत तहमा कार्यान्वयनमा लैजान आवश्यक भूमिका खेल्न तयार रहेको बताए ।