काठमाडौं । श्री रुद्रायणी देवीको १२ वर्ष मेला २०८० आयोजना हुने भएको छ ।
आइतबार रुद्रायणी गुठीले ललितपुरमा पत्रकार सम्मेलन गर्दै श्री रुद्रायणी देवीको १२ वर्ष मेला २०८० आयोजना गर्ने जानकारी दिएको हो ।

खोकनाको ऐतिहासिक महत्वपूर्ण जात्रा हरेक वर्ष भव्य र सभ्यरुपमा मनाइँदै आइएको छ ।
यो वर्ष अझ विषेश छ, किनकि यो वर्ष १२ वर्षे जात्रा हो । यो जात्रा खोकनावासीहरुको स्थानीय गाईजात्राको दिनबाट शुभारम्भ हुन्छ ।
सो दिन रुद्रायणी मन्दिरमा विराजमान रुद्रायणी देवीलाई रुद्रायणी देवगणहरुबाट १ महिनाका लागि विधिवत रुपमा पूजा अर्चना गरी यो ‘कुनेगु’ कार्य गरिन्छ ।

त्यस क्रममा खोकना गढ़ पर्खालभित्र नुहाउने, लुगा धुने, छालाका सामानहरु लगाउने, कुखुराको मासु, अण्डा, पूजामा रातो टीका, घण्टी बजाउने, मनोरञ्जनात्मक कार्यहरु गर्ने, भोज भतेर आदिमा कार्यहरुमा पूर्ण रुपमा प्रतिबन्ध गरिन्छ ।
खोकना भित्र अवस्थित श्री खण्ड भवानीमा यी कुनै कार्य गरिँदैन किनकि यो समयमा रुद्रायणी मन्दिर भित्र रहेका सबै देविदवताहरु गुफामा रहेका हुन्छन् भन्ने मान्यता छ । तर संरक्षण तथा सुरक्षाका सबै कार्यहरु भने गर्नु पर्ने हुन्छ ।

यस समयमा माथि प्रतिवन्धित कार्य भए पनि श्री खण्ड भवानी मन्दिरमा अवस्थित श्री खण्ड भवानीमा प्रत्येक दिन बिहान नृत्य पूजा गर्नु पर्छ । साथै सो पूजामा अनिवार्य रुपमा रक्त चन्दनको रातो टीका र श्रीखण्डको सेतो टीका राखेर नृत्य पूजा गर्नु पर्छ ।
१२ बर्षे मेला जात्रा मनाउने क्रममा मुख्य रुपमा रहेको जात्रा असोज शुक्ल तृतीयालाई लिइन्छ । अरु जात्राहरु योभन्दा अघिल्लो वर्ष जसरी चलाइँदै आएको छ यो वर्ष पनि त्यसरी नै चलाइन्छ ।

यस दिन अर्थात् ढोका बाहिर चोखो राँगा काट्ने दिन देःसा (दया) मनाइन्छ । उक्त देःसा जात्रा शुरु गर्नुअघि असोज महिनाको द्वितीयाका दिन श्री रुद्रायणी देवगणहरुबाट आफ्नो शक्ति सञ्चयस्वरुप विभिन्न स्थानहरुमा ‘द्यो का वनेगु’ कार्य गरिन्छ ।