ललितपुर । नेपाल–जापान जनसम्पर्क समितिले प्रकोप व्यवस्थापन सम्बन्धी कार्यक्रममा सहभागी हुन जापान पुगेका ललितपुरका जनप्रतिनिधिको स्वागत गर्दै प्रजातान्त्रिक शक्तिलाई बलियो बनाउन प्रवासमा रहेका नेपालीहरूको भूमिका विषयक छलफल कार्यक्रम आयोजना गरेको छ । उनीहरूलाई नेपाल जापान जनसम्पर्क समितिका अध्यक्ष बलराम श्रेष्ठले खादा र मालासहित स्वागत गरेका थिए । उक्त कार्यक्रममा महालक्ष्मी नगरपालिकाकी उपप्रमुख लक्ष्मी महर्जन पनि सहभागी छिन् । 
विपि चिन्तन प्रतिष्ठान र गणेशमान सिंह फाउण्डेसनसमेतको आयोजनामा भएको उक्त कार्यक्रममा ललितपुरको गोदावरी नगरपालिकाका प्रमुख गजेन्द्र महर्जनले वर्तमान अवस्थामा विश्वभरका लोकतान्त्रिक शक्तिहरू एक हुनुपर्ने बताए । 
उनले भने, ‘लोकतान्त्रिक शक्तिहरू बलियो हुँदा, नेपाली कांग्रेस बलियो हुन्छ, कांग्रेस बलियो भएपछि नेपालमा लगानी भित्राउन सहज हुन्छ ।’ 

नेपाली कांग्रेसलाई बलियो बनाउन विश्वभरका जनसम्पर्क समितिबीच सहकार्य, सम्वाद हुनुपर्ने उनले औल्याए । 
कांग्रेस जनताको पार्टी भएको बताउँदै मेयर महर्जनले रोजीरोटीका लागि विदेश पसेको नेपालीको सुख दुख कांग्रेसले मात्रै बुझ्ने स्पष्ट पारे । 
विदेशमा रहेका नेपालीले मताधिकार पाएको प्रसंग उल्लेख गर्दै वि.सं.२०८४ सालको निर्वाचन महत्वपूर्ण हुने नगर प्रमुख महर्जनले दाबी गरे । 
उनले भने,  ‘विश्वभर रहेका करिब ७० लाख नेपालले मताधिकार पाउनु भनेको चानचुने कुरा होइन, यो निर्वाचन नेपाल र नेपालीको लागि महत्वपूर्ण छ ।’ 
नेपाली कांग्रेस ललितपुका उपसभापति समेत रहेका मेयर महर्जनले नेपाल र नेपालीको आर्थिक र सामाजिक परिवर्तनका लागि ०८४ को  निर्वाचन महत्वपूर्ण हुने बताए । 
महालक्ष्मी नगरपालिकाकी उपप्रमुख तथा नेपाली कांग्रेस बागमती प्रदेश सदस्य लक्ष्मी महर्जनले जनसम्पर्क समितिको सहयोगले विकासका परियोजनाहरू नगरपालिकामा भित्राउन सकिने बताइन् । 

आउँदो अक्टोबर महिनामा हुन लागेको आनआरएनएको केन्द्रीय महाधिवेशनका लागि अध्यक्ष पदका उम्मेदवार महेश श्रेष्ठलाई निर्वाचित गराउन नगरप्रमुख महर्जनले सम्पूर्णमा आग्रह गरे ।  
महर्जनले गोदावरी नगरपालिकाको विकासका लागि जनसम्पर्क समिति, एनआरएनए जापान, एनआरएनए केन्द्रीय समितिलाई सहकार्य गर्न अनुरोध गरे । 
हाल केन्द्रीय उपाध्यक्ष रहेका महेश श्रेष्ठले गोदावरी नगरपालिको विकासको लागि सहयोग र सहकार्य गर्न तत्पर रहेको बताए । उनले एनआरएन अध्यक्ष पदमा निर्वाचित भए सहकार्यलाई नयाँ शिराबाट संस्थागत रुपबाट नै सुरु गर्ने प्रतिबद्धता पनि व्यक्त गरेका छन् ।