शरणार्थी प्रकरणमा ३० जनाविरुद्ध मुद्दा, २८.८ करोड बिगो दाबी

नक्कली शरणार्थी प्रकरण

बुधबार, जेठ १०, २०८०

काठमाडौं । जिल्ला सरकारी वकिलको कार्यालय काठमाडौं नक्कली भुटानी शरणार्थी प्रकरणमा ३० जनाविरुद्ध बुधवार मुद्दा दायर गरेको छ । उनीहरूलाई ठगी, किर्ते, राज्यविरुद्धको अपराध र सङ्गठित अपराधमा मुद्दा दर्ता गरिएको जिल्ला सरकारी वकिलको कार्यालयका प्रवक्ता लक्ष्मण उपाध्याय घिमिरेले बताएका छन् । ‘प्रहरीले चारवटा अभियोगमा मुद्दा दर्ता गर्न सिफारिस गरेकोमा हामीले किर्तेसम्बन्धी थप मुद्दा पनि दायर गरेका हौँ’, उनले भने ।
काठमाडौं जिल्ला अदालतमा दर्ता गरिएको मुद्दामा आरोपितहरूबाट कुल २८ करोड ८१ लाख रुपैयाँ बिगो दाबी गरिएको छ । सरकारी वकिलको कार्यालयले सम्पत्ति शुद्धीकरण विभाग र अख्तियार दुरुपयोग अनुसन्धान आयोगलाई पनि आरोपीहरूविरुद्ध अनुसन्धान गर्न अनुरोध गरेको छ ।
यसअघि प्रहरीले बुझाएको अनुसन्धान प्रतिवेदनको अध्ययन गरी मुद्दाबारे निर्णय लिन सरकारी वकिलको कार्यालयले आठ जनाको टोली बनाएको थियो । मुद्दा दायर गर्नका लागि बुधवार अन्तिम म्याद थियो । सङ्गठित अपराधसम्बन्धी अभियोगमा प्रहरीले अनुसन्धान थालेको ६० दिनभित्र सरकारी वकिलको कार्यालयले मुद्दा दायर गरिसक्नुपर्ने हुन्छ ।
मुद्दा दर्ता भएका ३० जनामध्ये १४ जना फरार छन् भने दुई पूर्वमन्त्रीसहित अरू प्रहरी हिरासतमा छन् ।

यी हुन् आरोपित
१.केशवप्रसाद दुलाल
२. सानु भण्डारी
३. सागर राई
४. सन्देश शर्मा
५. टंककुमार गुरुङ
६. इन्द्रजित राई
७. टोपबहादुर रायमाझी
८. सन्दिप रायमाझी
९. टेकनारायण पाण्डे
१०. नरेन्द्र केसी
११. गोविन्दकुमार चौधरी
१२. रामशरण केसी
१३. बालकृष्ण खाण
१४. आङटावा शेर्पा
१५. शमशेर मियाँ
१६. टेकनाथ रिजाल
१७. केशव तुलाधर
१८. लक्ष्मी महर्जन
१९. हरिभक्त महर्जन
२०. अशोक पोखरेल
२१. धिरेन राई
२२. दिपा हुमागाञी
२३. निरज राई
२४. राजेश अर्याल
२५. मोहनराज राई
२६. आशिष बुढाथोकी
२७. बिनिता सावदेन लिम्बू
२८. निरन्ज कुमार खरेल
२९. सुनिल बुढाथोकी
३०. प्रतिक थापा

प्रहरीले के ‍सिफारिस गर्‍यो ?
नक्कली भुटानी शरणार्थी प्रकरणमा प्रहरीले ३३ जनाविरुद्ध विभिन्न मुद्दा चलाउन सरकारी वकिलको कार्यालयलाई सिफारिस गरेको थियो ।
काठमाडौं उपत्यका अपराध अनुसन्धान कार्यालयले आरोपितहरूबाट २७ करोड ५० लाख ५७ हजार रुपैयाँ बिगो असुल गर्न सिफारिस गरेको थियो ।
नेपाली नागरिकलाई नक्कली भुटानी शरणार्थी बनाएर अमेरिका पठाउने नाममा ठगी गरेको अभियोगमा प्रहरीले मुद्दा चलाउन सिफारिस गरेका व्यक्तिहरूमा दुई पूर्वमन्त्री र एक बहालवाला सचिवसहित अधिकारीहरू र उक्त ‘गिरोह’मा संलग्न भनिएका व्यक्तिहरू छन् ।

‘ठगिनेमा विद्यार्थीदेखि गृहिणीसम्म’
उक्त प्रकरणमा संलग्नताको आरोप लागेका भूतपूर्व उपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाण, उपराष्ट्रपति कार्यालयमा कार्यरत सचिव टेकनारायण पाण्डे, भुटानी शरणार्थीलाई स्वदेश फिर्तीका लागि अभियान चलाइरहेका शरणार्थी नेता टेकनाथ रिजालसहित १६ जना प्रहरी हिरासतमा छन् ।
पूर्वगृहमन्त्री रामबहादुर थापाका तात्कालिक सुरक्षा सल्लाहकार इन्द्रजित राई, पूर्वमन्त्री रायमाझीका छोरा सन्दीप रायमाझी तथा बिचौलिया भनिएका केशव दुलाल, सानु भण्डारी, सन्देश शर्मा, टङ्क गुरुङ, सागर थुलुङ राईलाई पनि प्रहरीले पक्राउ गरेको छ । प्रहरीले फरार रहेका अझै केही आरोपितहरूको खोजी भइरहेको जनाएको छ ।

अबको प्रक्रिया के हुन्छ ?
बुधवार मुद्दा दायर भएपछि अब अदालती प्रक्रिया शुरू हुन्छ।
“गोलाप्रथाबाट न्यायाधीशको इजलास चयन हुन्छ अनि त्यसपछि सबै प्रतिवादीको बयान शुरू हुन्छ,” प्रवक्ता घिमिरेले भने । “बयान सकिएपछि थुनछेक बहस शुरू हुन्छ। थुनामा राखेरै बाँकी कारबाही अगाडि बढाउने कि धरौटीमा रिहा गरेर गर्ने भन्ने कुरा त्यहाँबाट तय हुन्छ।” थुनछेकको आदेश आएपछि मुद्दाको अर्को प्रक्रिया अगाडि बढ्ने उनी बताउँछन् ।

कुन अपराधमा कति सजाय ?
आरोपितहरूमाथि लगाइएका अभियोगमध्ये सबैभन्दा धेरै सजाय र जरिवाना ठगी र किर्तेसम्बन्धी कसुरमा रहेको छ । ती दुवै अभियोगमा सातरसात वर्ष जेलसजाय र ७०–७० हजार रुपैयाँसम्म जरिवाना तोकिएको छ ।
राज्यविरुद्ध अपराधमा पाँच वर्ष जेलसजाय र ५० हजार रुपैयाँसम्म जरिवानाको कानूनी व्यवस्था छ । त्यसैगरी सङ्गठित अपराधको कसुरमा पनि पाँच वर्ष जेलसजाय र ५० हजार रुपैयाँसम्म जरिवानाको व्यवस्था छ ।
शरणार्थी प्रकरणमा अहिलेसम्म के भयो ?

saranarthi kanda1684066250.jpg